Jesu vuẹ idibo rọyen nẹ: “Jẹ urhukpẹ wẹn la, rere ayen mrẹ iruo esiri wẹn rere ayen vwẹ ejiro kẹ Ọsẹ wẹn rọ hẹ obo odjuvwu.” (Matiu 5:16) Avwanre vwẹ intanẹti vẹ ekuakua rẹ ona kpokpọ efa vwo ruẹ ọnana. Evuẹ ri shekpahen iruo rẹ Iseri ri Jihova vẹ oborẹ avwanre segbuyota yehẹ wẹbsaiti avwanre, jw.org/urh. Erọnvwọn vọ yen wọ sa mrẹ vwọ?

Ẹkpahọnphiyọ ri Baibol na vwọkẹ enọ ri kpokpo ihwo ẹwẹn. Wọ sa mrẹ ẹkpahọnphiyọ rẹ enọ evo ri kpokpo ihwo ẹwẹn vwẹ evun rọyen. Kerẹ udje, ọmọbe re se Ojaẹriọ Che Ghine Vwoba? kugbe Ihwo ri Ghwuru na Ghine Sa Rhoma Dia? herọ vwẹ ejajẹ re vrẹ 600 vwevunrẹ intanẹti. Wọ je sa mrẹ New World Translation vwẹ ejajẹ re vrẹ 130, ọtiọyen ji te ẹbe buebun re vwo yono Baibol na kerẹ Die Yen Baibol na Se Yono Avwanre? kugbe ọbe Uwevwin Orhẹrẹ vẹ Awake! kpokpọ. E se se buebun rẹ ẹbe nana, kerhọ rẹ uhworo rayen, yerẹ danlodu rẹ ọrẹ uhworo, PDF yẹrẹ EPUB. Ohwo rẹ ejajẹ ọfa de dje omavwerhovwẹn phia, wo se printi iyovwinreta evo kẹ vwẹ ejajẹ rọyen. Ividio buebun herọ vwẹ ejajẹ rẹ idin. Wọ sa danlodu rẹ eha rudje ri Baibol, isese ri Baibol revwo ru eha rudje, kugbe ine evwevwerhen buebun.

Evuẹ uyota kpahen Iseri ri Jihova. Iyẹnrẹn kpokpọ vẹ ividio ri shekpahen iruo akpọeje avwanre, obo re phia kẹ Iseri ri Jihova, vẹ ukẹcha rẹ avwanre vwọ kẹ ihwo rẹ emu phia kẹ, je hẹ evun rọyen. Wọ je sa mrẹ evuẹ ri shekpahen eghwẹkoko re che ru kugbe adrẹsi rẹ eghọn ukoko avwanre vwevunrẹ wẹbsaiti na

Urhukpẹ rẹ uyota na ro asan ri me sheri vwẹ akpọ na womarẹ wẹbsaiti avwanre. Ihwo rehẹ akpọeje mrẹ erere no cha, tobọ ji te ihwo rehẹ ubrakpọ rẹ Antarctica dede. Ẹrhovwo avwanre ọyen ọ rẹ “ota rẹ Ọrovwohwo na vwọ yan hẹ obaro” kpatakpata, rere ọ hwarhiẹ urinrin bro ra.​—2 Tẹsalonaika 3:1.

• Mavọ yen jw.org/urh vwọ chọn ihwo buebun uko vwo yono Baibol na?

• Die yen wọ guọnọ hiẹ kpahen vwẹ Wẹb saiti avwanre?