Yesu Kristo o vhudza vhatevheli vhawe a ri: “Na tshaṋu tshedza kha tshi vhonetshele vhathu ngauralo; kha vha vhone zwivhuya kha inwi, vha rende khotsi-aṋu wa ṱaḓulu.” (Mateo 5:16) Uri ri kone u ita zwenezwo, ri shumisa zwavhuḓi thekinolodzhi ya musalauno, u katela na Inthanethe. Web site yashu jw.org/ve, ndi yone tshisima tshi re mulayoni tsha mafhungo ane a amba nga zwine Ṱhanzi dza Yehova vha zwi tenda na mishumo yavho. I na mini?

I na phindulo dzi bvaho Bivhilini dza mbudziso dzine dza anzela u vhudziswa. Ni nga wana phindulo dza dziṅwe mbudziso dza ndeme dze vhathu vha dzi vhudzisa. Sa tsumbo, zwibammbiri Naa Tshengelo I Ḓo Vhuya Ya Fhela? na Naa Vhafu Vha Nga Dovha Vha Tshila Zwa Vhukuma? zwi a wanala kha website yashu nga nyambo dzi fhiraho 600. Ni nga dovha na wana New World Translation nga nyambo dzi fhiraho 130 na bugu dzo vhalaho dzine dza thusa u guda Bivhili, u katela na bugu Bivhili I Funza Mini Zwa Vhukuma? na khandiso dza zwenezwino dza Tshiingamo na Awake! Vhunzhi ha dzenedzo khandiso muthu a nga dzi vhala kana a dzi thetshelesa kha Inthanethe kana a dzi kopa u itela u dzi thetshelesa, dziṅwe dzi kha tshivhumbeo tsha PDF kana EPUB. Ni nga kha ḓi gandisela muthu a re na dzangalelo masiaṱari a si gathi nga luambo lwawe! Hu na vidio nga nyambo dzo vhalaho dza zwanḓa. Ni nga kopa matambwa ane a tou thetsheleswa a muvhalo wa Bivhili, matambwa a Bivhili na muzika u takadzaho une na nga ḓiphina ngawo musi no ḓiawetshela.

I na mafhungo a vhukuma nga ha Ṱhanzi dza Yehova. Hu dovha ha vha na mafhungo a zwenezwino na vidio pfufhi ine ya amba nga ha mushumo washu wa shango ḽoṱhe, zwiitea zwine zwa kwama Ṱhanzi dza Yehova na mushumo washu wa u phalala. Ni nga wana nḓivhadzo nga ha mabuthano ane a ḓo vha hone na ḓiresi dza ofisi dzashu dza davhi.

Nga u shumisa enea maitele, ri khou ita uri tshedza tsha mafhungo-ngoho tshi vhonetshele kule vhukuma kha ḽifhasi. Hu khou vhuyelwa vhathu vha madzhango oṱhe, u katela na vha Antarctica. Ri rabelela uri “fhungo ḽa [Yehova, NW] ḽi gidime” ḽi tshi ya ḽifhasini ḽoṱhe, u itela uri Mudzimu a ṋewe vhugala.—2 Vha-Thesalonika 3:1.

• Website ya jw.org i khou thusa hani vhathu uri vha gude mafhungo-ngoho a Bivhili?

• Ni nga takalela u sedza mini kha website yashu?