Hi Jesu-Kristo nagsiring ha iya mga sumurunod: “Iglawag niyo an iyo mga suga ha atubangan han mga tawo, basi hira kumita han iyo mga mag-opay nga buhat, ngan maghimaya hira ha iyo Amay nga aadto ha langit.” (Mateo 5:16) Ha pagtuman hito, ginpapahimulsan namon an moderno nga teknolohiya, upod na an Internet. An jw.org—an amon opisyal nga Web site—nagsusulod hin mga impormasyon mahitungod han amon gintotoohan ngan buruhaton sugad nga mga Saksi ni Jehova. Ano an makikita didto?

Baton han Biblia ha mga pakiana nga agsob ibangon. Mabibilngan ha amon Web site an baton ha pipira han pinakaimportante nga mga pakiana nga iginbangon han mga tawo. An unom hito ginbabaton han tract nga Karuyag Mo ba Hibaroan an Kamatuoran? nga makikita didto ha sobra 400 nga yinaknan. Makikita liwat didto an New World Translation ha sobra 100 nga yinaknan ngan an mga publikasyon nga makakabulig ha pag-aram han Biblia, upod na an libro nga Ano Gud ba an Igintututdo han Biblia? ngan an bag-o nga mga gowa han An Barantayan ngan Pagpamata! Damu hito an mababasa, mapapamatian, o mada-download ha pormat nga audio, PDF, o EPUB. Mahimo ka pa ngani mag-print hito para ha usa nga interesado ha Biblia ha iya kalugaringon nga yinaknan! May makukuha ka gihap nga mga video ha damu nga sign language. Puydi ka liwat mag-download hin audio drama nga pagbasa han Biblia, drama ha Biblia, ngan hin mag-opay nga musika.

Husto nga impormasyon mahitungod ha mga Saksi ni Jehova. Makikita liwat ha amon Web site an pinakabag-o nga mga impormasyon ngan mga video clip mahitungod han amon bug-os-kalibotan nga buruhaton, mga panhitabo nga nakakaapekto ha mga Saksi ni Jehova, ngan kon ano an amon ginhihimo ha pagbulig ha iba. May-ada liwat ito impormasyon mahitungod han tiarabot nga mga kombensyon ngan mga detalye kon paonan-o makukontak an amon mga sanga nga opisina.

Pinaagi hini, naipapasanag namon an kalamrag han kamatuoran tubtob ha pinakahirayo nga dapit han tuna, ha mga tawo ha ngatanan nga kontinente, upod na ha Antartika. Amon igin-aampo nga “an pulong ni Jehova padayon nga maipasamwak hin madagmit” ha bug-os nga tuna, para ha iya himaya.—2 Tesalonika 3:1, NW.

• Paonan-o an jw.org nakakabulig ha damu nga mahibaro han kamatuoran ha Biblia?

• Ano an imo karuyag kitaon ha amon Web site?