Yésso Kristo a lé leu a mbou mézingto pi nguè: “Pè gheu nka’ wè é kè’è a mvhô épouô ménông, pô ping njiô méfa’ mbông mè, nguiè awou’té a mbou Mô’ô wè yi a nang a atheuè lepwhou.” (Matthieu 5:16) Poup tè, mpeukè ghé zing anè nteukné jiô mèt, ndôk métsitsi swhi pa’ internèt la, ngôkô mbông-ô. Site internèt weuk jw.org, a si ngô a kwa’ aji’ zi o ghô fa’ métsoo anè mézi’né pô méfa’ Ménjheuè-njiô Joovah éwou. Mè ghô jiô akô a nteu site internèt wouô mèt-é?

Ajoumi Biible a shoung anè ménzèté lélœuè épouô. O ghô jiô ajoumi Biible a tsô’é anè ménzèté mi épouô té nzaa é wèè. Mépap pa’: Tè ngueô’ é ghô néung-è lé’é mbou mii? mbô Tè épouô pi lé kwheuté ghô shi’ nzimné anè legwheu? é nteu site internèt mèt anè méshoung-né méla’ té ntôkô 800. O ghô zeung njiô Biible weuk Traduction du monde nouveau a nteu éwou anè méshoung-né méla’ té ntôkô 160. O ghô zeung njiô métsoo té nzaané mi é kuité épouô a lézi’nè Biible, pa’ akèté zi a lè Que nous enseigne la Bible ? mbô mékèté mi é touô ta’ légheuô anè méssang mèmbia pa’ La Tour de Garde pô Réveillez-vous ! O ghô tông kèè njou’, nzeung fôkô lélœuè mékèté mouô mèt a nteu internèt, anè MP3, PDF kèè EPUB lè. O ghô zeung fôk émô’ mépap, mbing nguiè a mbou gning yi a si nkông-ô, anè ashoung-né ala’ zi! Mévidéo zeung ngô éwou anè ashoung-né mémbou’-ntchou. O ghô fôkô Biible yi mè si ntông-ô pa’ théâtre la, mbô méfilme ngheu mézôp mi é mbông a lélôk ngangté.

Kwa’ anouneu anè Ménjheuè-njiô Joovah. Site internèt weuk a zeung ngwè ménkeu swhi pô mévidéo anè afa’ zeuk a nteu ngông, mbô métsoo mi Ménjheuè-njiô Joovah é gheu ndôk nkuité épouô pi méndœuè-nou é ngheuè wôp. O ghô zeung njiô mépap a lélôk ntông épouô anè mémia métchou’té meuk, mbô ménoumba a lélôk ntông kèè ntii akèté a mbou mébéthel meuk lè.

Mpeukè lôk métsoo mouô mèt ngheu nka’ anouneu é pou nkè’è, mbô anè méji’ mi é tè a nguia sia a ndoo éssi atsetsa’. Épouô mékap ala’ ntseum, tè mbô épouô Antarktique é jheuè zôp apè anè site internèt wouô mèt. Mpeukè si ngheuè apriya nguè “ashoung-nè Joovah, a ku’né njheu” ngông ntseum, mè ping éfhou poup ngou’tè Ndem.​—2 Thessaloniciens 3:1.

• Site internèt jw.org a si nkuitè épouô té nzaané a lézi’nè anouneu zi a nteu Biible é lèkô?

• O si nkông-ô wou a léfa’ akô a nteu site internèt weuk-é?