Piʼtä cu̧huo̧juä̧chä̧ja̧ʼa̧ttö̧ esehuätöjä, ujutu tötöʼcö jähuäʼinä, Dios aditähuä taditö jähuäʼinä cu̧huo̧jua̧ päʼö. Piʼtänä cu̧huo̧juä̧chä̧ʼi̧jö̧ ppädäʼijaʼa huäjunä tocuʼa päʼö jitä pä̧nä̧ Jeohuarö pä̧huä̧ rö̧jö̧ jȩpä̧tö̧mä̧ ujututä ja̧ʼa̧ päʼö. Ucuru ä̧tȩpä̧tö̧jä̧ Dios jähuä juhuaʼa yabocu ujutucu cu̧huo̧jui̧ʼa̧ päʼö. Cu̧huo̧juä̧chö̧ cuamönä cuahuaruhuäcuʼinä, korotö cuahuaruhuäcuʼinä cucuocuʼa̧nö̧ ja̧ʼa̧, ja̧ʼhua̧ta̧nö̧ tö̧ca̧ca̧cuä̧rö̧ mo̧ro̧ pätecuächö taʼanö cuicha päʼö ja̧ʼa̧ (Hebreos 10:23-25).

Jeohua ötöʼcö juhuaʼa yabocu cu̧huo̧juä̧cho̧mȩnä̧ huäjunä to̧cu̧ʼä̧cuä̧huä̧cua̧jä̧ Chutä ucuru repeʼö päʼö. Ja̧ʼhua̧nö̧ ja̧ʼa̧ttö̧ ucuʼinä Ja̧u̧ru̧ repecu huȩnȩ cui̧jȩpa̧ päʼö cujuruhuächä̧cua̧jä̧ (1 Juan 4:8-10, 19). Mo̧ro̧ jö̧ taʼanö jȩcu̧ʼu̧nä̧, ¿tocu jö̧nä̧ cui̧jȩpö̧ʼa̧nö̧ ja̧ʼa̧ttö̧ pi̧yȩmä̧? Churutä esetö cua̧ʼcua̧rö̧ teönä cu̧jo̧mȩnä̧, ¿tocu jö̧nä̧ ppädöʼa̧nö̧ ja̧ʼa̧ttö̧ ucurumä? Ujutu Jeohua umöhuäyotöcu Chutä hueö juhuaʼa yabocu pä̧huä̧ rö̧jö̧nä̧ jȩcu̧ʼa̧ päʼömä, ¿däje ppädäcuaʼattö? Ucuru Dios I̧huȩnȩ huo̧juȩtö̧ ppä̧dä̧cua̧ pi̧yȩ jäecuä ädätö, ucu cuahuaruhuäcuʼinä “Dios ucuturu repeönä [cu̧ja̧cuä̧tu̧cua̧ päʼö ...] kä̧cuä̧huä̧ iʼco iyome jubö päiʼönä” (Judas 21).