E fakafetai atu eiloa mō te fakaaogaga o te taimi ke iloilo ki te polosiua tenei ko te mea ke fakamasani ei koe mo tino lotu Molimau a Ieova, ke tauloto ki olotou faifaiga, kae ke lavea atu foki a gasuesuega o te motou fakapotopotoga. E fakamoe‵moe eiloa matou me ne fesoasoani atu ke iloa ne koe me i a matou ko tino kolā e fai ne latou te loto o Ieova i aso nei. E fakamalosi atu matou ke tumau eiloa koe i te taumafai ke iloa ne koe te Atua, ke fakailoa atu ki ‵toega o ou kāiga mo taugasoa a mea e tauloto ne koe, kae ke kau mai faeloa ki fakatasiga a matou.​—Epelu 10:23-25.

Ka iloa aka ei ne koe me ko te uke o au mea e iloa e uiga ki a Ieova, ko te momea aka foki o te lavea ne koe tena alofa tonu ki a koe. Ka fakamalosi aka ei koe ke fai a mea katoa e mafai ne koe o fai ke toe fakaasi atu te alofa ki a ia. (1 Ioane 4:8-10, 19) E fakaasi atu la pefea ne tatou a te manakoga tenā i ‵tou olaga i aso katoa? Kaia e ‵tau ei o fiafia malosi koe ke fakalogo ki ana tulafono i mea tau amioga? Kae se a te mea ka fesoasoani atu ki a koe ke fai fakatasi ne tatou a te loto o te Atua? Ka fiafia eiloa tou faiakoga faka-te-Tusi Tapu ke ‵sala fakatasi koulua ki tali kolā ka fai ei koe mo tou kāiga ke “tumau koutou i loto i te alofa o te Atua . . . telā e iku atu ki te ola se-gata-mai.”​—Iuta 21.

E ‵kami atu eiloa ne matou a koe mo te alofa ke tumau eiloa koe i te gasolo atu ki mua i te auala o te munatonu mai i te sukesuke ki te suā tusi tenei “Ke Tumau i te Alofa o te Atua.”