LÈSON 1
Ki bon nouvèl Bondyé ni pou nou ?
1. Ki nouvèl ki ka vin dè Bondyé ?
Bondyé vlé nou viv éré asi latè. I kréyé latè èvè tousa ki anlè-y, paskè i enmé-nou. Talè, i ké aji : i ké ba toutmoun toupatou si latè on landèmen ki méyè. I ké soulajé-yo lè i ké woté tousa ki ka fè-yo soufè (Li Jérémi 29:11).
Pon gouvènman pa jen rivé woté vyolans, maladi oben lanmò. Érèzman, i ni bon nouvèl ! Talè, an plas a tout gouvènman ki tini, Bondyé ké mété gouvènman a-y. Anba gouvènman-lasa, toutmoun asi latè ké viv trankil é ké ni lasanté (Li Izayi 25:8 ; 33:24 ; Danyèl 2:44).
2. Poukwa sa vréman enpòwtan kè nou konnèt sé bon nouvèl-lasa ?
Sé yenki lè Bondyé ké woté moun-méchan asi latè kè soufrans ké fin (Sofoni 2:3). Kitan sa ké fèt ? Tout mové biten ki ka fèt si latè konnyéla té ja anonsé adan Pawòl a Bondyé, Labib. Tousa ki ka pasé jòdijou ka montré kè talè Bondyé ké aji (Li 2 Timoté 3:1-5).
3. Ka nou dwètèt fè ?
Nou dwèt aprann konnèt Bondyé. Pou sa, fò-nou étidyé Pawòl a-y, Labib. Bib-la, sé kon on lèt on papa plen lanmou voyé ba pitit a-y. I ka di-nou sa pou nou fè pou nou viv pli byen dépi konnyéla, é pou dèmen nou viv si latè san janmé mò. Pétèt ni sa ki pé ké kontan vwè ni on moun ka édé-w konprann Labib. Men on lokazyon konsa, dè konnèt on landèmen ki méyè, two bèl pou lésé-y pasé ! (Li Pwovèb 29:25 ; Révélasyon 14:6, 7).
Ay gadé sa osi...
KIMOUN NOU YÉ ?
Étidyé Labib, poukisa ?
Grasa Labib, toupatou asi latè, plizyè milyon moun ja touvé répons a dé kèsyon enpòwtan yo té ka pozé-yo asi lavi. Èskè vou osi ou té’é vlé ni sé répons-la ?
