ʼƗKITƗARIKA 1
¿Keʼaneneetɨ niuki ʼaixɨ ʼanuyɨtɨkaitɨ́ taheetsíe mieme pɨtixuawe?
1. ¿Keʼaneneeme niuki ʼaixɨ ʼanuyɨtɨkaime Yuútsi taheetsíe mieme pexeiya?
Yuútsi pɨtinakeʼerie teuteri ʼaixɨ yari memuʼuwani. Wareunakeʼeriekɨ Kwieé putaweewi metá naitɨ tita heetsiena mɨtixuawe. Kwitɨwa pɨtikumawiriyá tita mɨtatiukaʼenitɨwa, yunaitɨ teuteri naime kwieepatsíe memutaama ʼuxaʼa waarié tuukaari ʼaixɨ ʼaneeme memexeiyanikɨ. Nakaterɨwa Jeremías 29:11. *
Hiikɨ teuteri meyukwiitɨwe, metekukuuye, metakuukuwe. Xewitɨ ʼiitsɨɨkame kwayɨwe mɨtikumawiriyá. Tseepá hiikɨ yemɨtiyɨatɨne, niuki ʼaixɨ ʼanuyɨtɨkaitɨ́ pɨtixuawe: kwitɨwa Yuútsi meyunaime ʼiitsɨɨkate pɨwakumawiriyá metá ʼiitsɨɨkameya tinɨʼaatɨ kanayeimɨkɨ. Kiekarieya ʼaixɨ yari metitetɨ mepakɨɨné metá mekatekukuuyetɨ. Nakaterɨwa Isaías 25:8; * 33:24, * metá Daniel 2:44. *
2. ¿Títakɨ mɨkɨ niuki ʼaixɨ mɨʼanene tetehetimaamateni?
Mɨkatixuawenikɨ rí tita mɨtatiukaʼenitɨwa, teuteri haxa memɨteʼuʼiyaari Yuútsi pɨwareuyehɨaní (Sofonías 2:3). ¿Kepauka tá yapɨtiyurieni? Hiikɨ tita teuteri mɨtiwarukaʼenitɨwa mɨkɨ pakaʼutɨariekai rí Yuútsi Niukieyatsíe. Yamɨtiyɨanekɨ pɨtikuhekɨkɨare kenaame kwitɨwa rí Yuútsi yuNiuki ʼayaʼatɨani. Nakaterɨwa 2 Timoteo 3:1-5. *
3. ¿Taame tá keteteyurieka?
Xewitɨ yuniwéma wareunakeʼerietɨ xapa warenɨʼairiwa heetsiena memɨtehakumaikakɨ, mɨpaɨ tsiere Yuútsi pɨreunakeʼerie, temeitimaamatenikɨ Bibliatsíe tepɨteyuʼɨɨkitɨaka. Maana yatatikuhɨawe kehepaɨ teyɨatɨ hiikɨ teyutemamaawietɨ temuʼuwani, tsiere tá ʼuxaʼa waarié tuukaari kaxɨɨweme tehexeiyatɨ temakɨɨnekɨ keteteyurieka. Tinamaiká, yunaitɨ mekwayukatemamaawieni xɨka Yuútsi Niukíeya peyuʼɨɨkitɨaka. Peukatikuhayeikawani, Yuútsi matsi waɨká ʼaixɨ tiʼaneneeme metiyetuirieni tita teuteri mekaʼateyetuiriewe. Nakaterɨwa Proverbios 29:25 * metá Revelación (Apocalipsis) 14:6, 7. *
^ párr. 1 Jer 29:11: «Ne nepɨrakumaaté kenemɨtiyɨkɨhɨawe xeheetsíe miemekɨ -Jehová mɨpaɨ kanaineni-, nepɨreunakeʼerie ʼaixɨ xemɨteheuʼerieka, xekateʼukaʼeniwatɨ, ʼuxaʼá waaríe nepɨxetiyatuirieni tita xemɨtetakwewie.
^ párr. 2 Isa 25:8: ʼIitsɨɨkame Jehová mɨɨkí heyeme pɨkumaweriyá, meyunaime waʼuukai kanaʼitiexɨamɨkɨ metá naime kwieepatsíe pɨtikumawiriyá tita haxa mɨtikuniuwa kiekarieyakɨ, Jehová mɨpaɨ kanaineni.
^ párr. 2 Isa 33:24: Metá xewitɨ kwatayɨní: «Nepɨreukuye». Teuteri kwieépa meʼuʼuwaatɨ memakɨɨné mepɨtehauyehɨwiyarieni tita haxa memɨteʼuyuri.
^ párr. 2 Dn 2:44: »Metá kepauka mɨkɨ ʼiitsɨɨkate memɨtenɨʼakatsíe, Yuútsi mɨyuawitsíe kiekame ʼiitsɨɨkame panukakení mɨkɨ nɨʼarikaya wakwaʼuʼaní. Metá ʼikɨ ʼiitsɨɨkametsíe hatsuaku teuteri mekatetanɨʼani. Meyunaime ʼiitsɨɨkate kaniwareuyehɨamɨkɨ, metá mɨkɨ xeikɨ́a tinɨʼatɨ heyeme kanayeimɨkɨ;
^ párr. 3 2 Tim 3:1-5: ʼIkɨ xetenemaiká, kenaame kwinatɨrieka xemeuyeyɨakatsíe yeme haxa tiuʼaneeni, waɨriyarika pɨtiuʼuwatɨni. Teuteri yuheetsíe xeikɨ́a meʼutiʼeerietɨ mekanakɨnikuni, tumini xeikɨ́a menakeʼerietɨ, kwinié meteʼuyuʼɨɨretɨ, meyutaweʼerietɨ, haxa meʼutiyuatɨ, yupaapama mekawareuʼenietɨ, pampariyuútsi mekaʼutiyuatɨ, meteʼuyukuʼeʼeiriwatɨ, yunuiwarima mekawanakeʼerietɨ, mekahauyuʼenietɨ meteʼuyukaʼiitaiyatɨ, mekawaʼuuwetɨ haxa mɨtiʼaanenetsíe, haxa meteyukumaamateketɨ, meʼayukwiiwawietɨ, ʼaixɨ mekatehauyuriekutɨ, yuhamikuma mewarayeʼuunietɨ mepakɨɨné, mekayuʼɨxatsitɨarinɨatɨ, yeme kwinié meteʼuyukataweʼerietɨ, metenakeʼerietɨ xeikɨ́a tita mutiwanaake Yuútsi tá hawaikɨ, waʼaatɨ ʼaixɨ tiʼaneeme meteʼayexeiya meteyuheekɨatɨ, haxa meteʼuʼiyaaritɨ tá; mɨkɨ wahaamatɨa peukaʼuyeikani.
^ párr. 4 Prov 29:25: Xɨka xewitɨ teuteri wahɨxie ʼutimaamaweni kaniyuwiniyamɨkɨ, keane tá Jehovátsie mɨkawíe pɨtaʼɨwiyarieni.
^ párr. 4 Rev 14:6,7: Metá xeime niuki tuayame neniuxeiya yuawitsíe hixɨapa ʼuyewiximeme, metá nexeiyakaitɨni kaxɨɨweme niuki ʼaixɨ ʼaneneeme, wataxaatɨanike kwieépa memɨtaama, naitɨ países, nuiwarite, naitɨ yɨɨkɨ memɨteʼuniuka metá kiekarite, painekai tɨrɨkarima: «Yuútsi yeme ʼaixɨ xeketenexeiyani metá xenayexeiyani, mayaʼakɨ tuukaari tiwatawawirienitsíe kememɨteʼuyuri, ʼayumieme mepayexeiyani keane yuawi mutawewi, kwieé, haramara metá munetɨa haixate».
Xɨari ʼikɨtá metsiʼunakiwe
TIKUXAXAATSIWATƗ TAHEETSÍE
¿Títakɨ Biblia hetsíe teteyu’ɨkitɨaka?
Meyuwaɨkawatɨ teuteri Kwieépa memɨtaama Yuútsi Niukieyatsíe mepɨteukaxexeiyá tita kwinié memɨteheumaiku. Tematsi’inié pemɨti’ati’ɨkitɨanikɨ tahaámatɨa ’ikɨ xapatsíe mɨrayemie ’aixɨ ti’aneneetɨ tita tatuukaaritsíe yeme mɨreuyewetsé.
