Kayat ti Dios a matagiragsak dagiti tattao ti biag ditoy daga. Pinarsuana ti daga ken ti amin nga adda iti dayta gapu ta ay-ayatenna dagiti tattao. Dandanin agtignay tapno maipaayanna iti nasaysayaat a masanguanan dagiti tattao iti intero a daga. Ikkatennanto dagiti makagapu iti panagsagaba dagiti tattao.​—Basaen ti Jeremias 29:11.

Awan pay ti gobierno a nakaikkat iti kinaranggas, sakit, wenno ipapatay. Ngem adda naimbag a damag. Dandanin suktan ti gobierno ti Dios ti amin a gobierno ti tao. Dagiti iturayan dayta a gobierno tagiragsakendanto ti talna ken nasayaat a salun-at.​—Basaen ti Isaias 25:8; 33:24; Daniel 2:44.

Agpatingga laeng ti panagsagaba inton dadaelen ti Dios dagiti dakes a tattao ditoy daga. (Sofonias 2:3) Kaano a mapasamak dayta? Impakpakauna ti Sao ti Dios dagiti kasasaad a mangdiddidigra ita kadagiti tattao. Ipakita dagiti agdama a pasamak a dandanin agtignay ti Dios.​—Basaen ti 2 Timoteo 3:1-5.

Masapul nga adalentayo ti maipapan iti Dios manipud iti Saona, ti Biblia. Mayarig dayta iti surat ti naayat nga ama a mangibagbaga kadatayo no kasano a matagiragsaktayo ti nasaysayaat a biag ita ken ti agnanayon a biag ditoy daga iti masanguanan. Mabalin a saan a kayat ti dadduma nga adda tumulong kenka a mangtarus iti Biblia. Ngem ditay koma sayangen ti gundaway nga agbiag iti nasaysayaat a masanguanan.​—Basaen ti Proverbio 29:25; Apocalipsis 14:6, 7.