Gad—im waahn evribadi fi enjai laif pan di ort. So im mek di ort an evriting pan it kaa im lov piipl. Suun suun, Gad a-go gi evribadi wan beta fyuucha no mata we dem liv. Im a-go get rid a aal a di sitn dem we mek wi sofa.​—Riid 1 Timoti 2:3, 4.

Wich govament yu nuo we eva get rid a vailens, diziiz, ar det? Nat iivn wan. Bot yu nuo wa Gad suun du? Gad suun get rid a aal a di difrant difrant govament dem we de aal uova di worl an set op fi im uona govament. Dem taim de, piipl we liv anda Gad govament naa go get sik at aal, an dem a-go liv iina piis.​—Riid Revilieshan 11:15; 21:3, 4.

A onggl wen Gad get rid a di wikid piipl dem, sofarin a-go don. (Zephaniah 2:3) So, a wen dat a-go apm? Aal a di badnis we a gwaan nou mek wi nuo se Gad suun du sitn bout it.​—Riid 2 Timoti 3:1-5.

Memba di piis an apinis we wi jos taak bout? Yu si fi enjai dat, yu afi lorn bout Gad fram di Baibl, we a fi im mesij fi wi. It tel wi ou wi kyan liv a beta laif nou an ou wi kyan liv rait ya so pan di ort fi eva. Som a yu fambili an fren dem mait no laik se yu a stodi di Baibl wid di Jeuova Witnis dem. Bot yu kyaahn mek dat stap yu fram lorn bout Gad kaa di fyuucha we Gad av in stuor fi yu tuu gud fi yu mis.​—Riid Luuk 6:22, 23; Revilieshan 14:6, 7.