Ṛebbi yebɣa a nɛic di sseɛd ɣef lqaɛa. Ixleq-ed lqaɛa d wayen akk yellan deg-s axaṭer iḥemmel-aɣ. Qrib a d-iger afus-is: ad yefk ussan yelhan i lɛibad akken ma llan, akken yebɣu yili laṣel-nsen. A ten-yesseṛtiḥ daɣen s tukksa ara yekkes ayen akk i d-yeţţawin leɛtab.​—Ɣer Irmiya 29:11.

Leɛmeṛ telli lḥukuma yessawḍen aţ-ţemḥu leqher, lehlak neɣ lmut. Acu kan, yella lexbaṛ yessefṛaḥen! Qrib ad ixlef Ṛebbi lḥukumat meṛṛa n yemdanen s lḥukuma-ines. Wid ara yilin ddaw n lḥukuma n Ṛebbi ad ɛicen di lehna w’ad sɛun ṣṣeḥḥa n lɛali.​—Ɣer Icɛaya 25:8; 33:24; Danyil 2:44.

Ur iḥebbes ara leɛtab alamma d asm’ara yemḥu Ṛebbi imcumen ɣef lqaɛa. (Ṣafanya 2:3) Melmi ara d-yeḍru waya? Awal n Ṛebbi, yeɛni Adlis Iqedsen, icar-ed ɣef lemḥayen i ţqabalen medden ass-a. Ayen akk iḍerrun ass-a iţbeggin-ed belli ur yeţɛeṭṭil ara Ṛebbi a d-iger afus-is.​—Ɣer 2 Timutawus 3:1-5.

Ilaq a nɣer Awal n Ṛebbi, yeɛni Adlis Iqedsen, iwakken a nissin Ṛebbi. Adlis-agi amzun ţ-ţabṛaţ i ɣ-d-yura baba-tneɣ i ɣ-iţḥibbin. Yeqqar-aɣ-d ayen i glaqen a t-nexdem akken a nesɛu tamɛict taxlaft tura akk-d tudert n dayem ɣef lqaɛa, ɣer zdat. Ahat ad ilin wid ur nfeṛṛeḥ ara s lemɛawna ara k-yeţţunefken akken aţ-ţfehmeḍ Adlis Iqedsen. Meɛna, teţţunefk-ak tegniţ akken a k-d-tṣaḥ temɛict igerrzen: ḥader a k-tṛuḥ tegniţ-agi!​—Ɣer Lemtul 29:25; Aweḥḥi 14:6, 7.