Ndzimu u no shaka kuti bathu ba shathile buchilo mu shango. Wa ka bumba shango ne chingwe ne chingwe chi mu ili ne kuti u no da bathu. U nowo dwa e tola thambo ku pa bathu buchilo gu no shathisa mu shango yose. U nowo dusa bathu mu zwithu zwi no ba dziyidza.​—Bala Jeremiya 29:11.

A kuna mbuso wa ka tongo khona pedzisa ku dziyidziwa, magwele, kene lufu. Ngono ku na ndebo mbuya. Mu chibaka chi futshwanana, Ndzimu u nowo biga mbuso uwe mu bumo gwe mibuso ye bathu. Bathu ba nowo busiwa ne bushe igogu, ba nowo shathila mbakiso ne mamuko a ka naka.​—Bala Izaya 25:8; 33:24; Daniele 2:44.

Ku dziyidzika kowo pela koga ha Ndzimu e dusa bathu ba ka bipa mu shango. (Zafaniya 2:3) Ichecho chowo shingikala lini? Dama le Ndzimu la ka gala la leba ne kwe mamo iyawa a no dziyidza bathu ngwenu. Zwithu zwi no shingikala ngwenu, zo lakidza kuti chibaka che kuti Ndzimu a tole thambo cha be pejo.​—Bala 2 Timoti 3:1-5.

Ta ka fanila ku zwidiya ne kwe Ndzimu ku dwa mu Dama lile, Baibili. I no fanana ne lukwalo gu no dwa ku na tate ba na ludo. I no ti budza kuti ti nga be ne buchilo gu butuka chini ngwenu ne kuti ti nga be ne buchilo gu si nga pele mu shango chini mu chibaka chi no zha. Malebeswa kuti bangwe ba nga dwa ba si nga shathile kuti no batshiwa ku hwisisa Baibili. Ngono ne kuti Ndzimu u no ti thembesa buchilo gu butuka mu chibaka chi no zha, a ti zo fanila lechedzela bathu be ti dzibila ku zwidiya ne kwago.​—Bala Zwiani 29:25; Zumbunulo 14:6, 7.