Mawej ukaakaam bwa ney baat biikal ni musangal ha bulab. Uhangil bulab ni biit byoos bidyoh bwaal i mukat baat. Mu mafuk makeeh oomw wiiyiiy kulong bwa ney baat ba byaab byoos bashikat bilengel. Wiiyiiy kwiibafudil myand yoos yitwaatwaal makeng.​—Bal Jeremih 29:11.

Mbulmatady ning waakaabumw kiishoh bend mwa kuman cikis, mabeej eeny lufw. Kady, kudy misah yilengel. Mu mafuk makeeh oomw Mawej wiiyiiy kuful mbulmatady yoos ya baan ba baat ni kuteekoh bukaleng bwindiy. Bukaleng oobw bwiiyiiy kulong bwa ney baat bashikat talal ni biikal ni bukash bwa nyeet.​—Bal Yeshaay 25:8; 33:24; Danyel 2:44.

Makeng miiyiiy kujimban teng hiikal Mawej mwiiy kuful baat babiih ha bulab. (Sefaniyah 2:3) I ciisang kaay ciiyiiy Mawej kuful baat babiih ha bulab? Diiy dya Mawej dileebel kal bwa makeng mady naam baat leeloow. Myand yiloolongek leeloow yileeleej ney Mawej ukaady ha kuman makeng aam.​—Bal 2 Timoteh 3:1-5.

Tudy ni bwa kulongw myand yitaatal Mawej. Myand eey yidy mu Bibl. Bibl udy teng na mukand udy taat udy ni lukat mwiitufundil. Wiituleeleej mutudy mwa kushikat bilengel leeloow, ni citudy mwa kulong bwa kuhet buumy bwa mwendelel mu mafuk miiyiiy kuuhal ook. I cya biin-biin ney baat bakwaabw kabiishoh bend biiy kwiikal ni musangal hadyoobw batal muut mukwaabw ukukwanjok bwiibuh kumvw Bibl bilengel. Kady buumy bwa mwendelel i dyaakalengel ditam, katwiishoh bend mwa kwiitabij bwa ney muut ning waakaabumw itulekeesh bwa kulongw Bibl.​—Bal Tusumw 29:25; Myand yisokolweel 14:6, 7.