Nzambi zola ti bantu yangalala na luzingu awa na ntoto. Yandi salaka ntoto mpe bima nyonso yina kele na ntoto samu yandi kezolaka bantu. Ntama mingi ve, yandi kesala diambu mosi samu bantu ya babuala nyonso bavuanda na luzingu ya mbote na bilumbu kena kuiza. Nzambi kekatula mambu nyonso yina kesalaka bantu mpasi.​—Tanga Yeremia 29:11.

Guvernema mosi ve menunga kumanisa kimpumbulu, bimbevo, to lufua. Kansi, yakele na nsangu mosi ya mbote: ntama ve, Nzambi kekatula baguvernema nyonso ya bantu, mpe na kisika na yau, yandi ketula yina ya yandi mosi. Guvernema yango keyadila bantu yina kevuanda na kiyenge mpe na mavimpi ya mbote.​—Tanga Izaya 25:8; 33:24; Danyele 2:44.

Bampasi kemanisa kaka ntangu Nzambi kekatula bantu nyonso ya yimbi awa na ntoto. (Sofoni 2:3) Wapi ntangu yandi kesala yau? Mpova ya Nzambi samunaka banda ntama mambu yina kena kusala bantu mpasi bubu yayi. Mambu ya yimbi yina kena kusalama bubu yayi kena kulakisa ti fioti kaka mebikana, Nzambi ketula nsuka na yinza yayi.​—Tanga 2 Timote 3:1-5.

Beto fuana longuka mambu ya Nzambi na nzila ya Biblia, Mpova na yandi. Yau kele mutindu mukanda yina tata ya luzolo mesonikina beto. Yau kena kutubila beto mutindu ya kuvuandila na luzingu ya mbote bubu yayi, mpe mutindu ya kuzua luzingu ya mvula na mvula awa na ntoto na bilumbu kena kuiza. Yau kele kedika ti bantu ya nkaka lenda yangalala ve nge longuka Biblia. Kansi mutindu Nzambi mepesa beto nsilulu ya luzingu ya mbote na bilumbu kena kuiza, beto fuana bikila bantu nzila ve banimina beto kulonguka Biblia.​—Tanga Bingana 29:25; Luzabusu 14:6, 7.