Gʼuiˬ sha chaw yaˇ htaꞈ miˬ guiˬ hkʼoˆ pyawˍ ve a shaꞈ teꞈ chehˇ tcuh gaˇ ve yoˬ. Gʼuiˬ sha chaw yaˇ htaꞈ haꞈ ve pa taw, miˬ guiˬ leh miˬ guiˬ hkʼoˆ cawˬ ve teˇ ceuˬ le le htaꞈ te hpanˍ ve yoˬ. Maˇ maw kʼo, mvuhˇ miˬ teˇ peˆ le le chehˇ ve chaw awˬ gʼuˇ suhˍ hpawˇ chi aꞈ kehˉ daꞈ tuˬ yawˇ teˇ ceuˬ ceuˬ htaꞈ te tuˬ yoˬ. Tuꞈ hkanˍ ve tawˆ la kuiˬ htaꞈ yawˇ te luˬ piˇ tuˬ yoˬ.—Yeˍraˍmiˆ 29:11 gʼaw sheˍ.

 Chaw yaˇ uˉ peunˍ ve awˬ moˍ hkʼaˬ teˇ moˍ kaꞈ haiˬ ve, naˬ beuˬ, leh suh ve teˇ ceuˬ htaꞈ maˇ gʼaˇ jaw. Yaꞈ hkʼaˇ, daꞈ ve awˬ lawn sha tanˇ cawˬ ve yoˬ. Maˇ maw kʼo, Gʼuiˬ sha ve mvuhˇ miˬ lehˬ chaw yaˇ uˉ peunˍ ve teˇ ceuˬ le le awˬ tan uˉ peunˍ tuˬ yoˬ. Gʼuiˬ sha ve mvuhˇ miˬ yaˇ chehˇ sha cawˬ sha leh, gawˬ lehˍ cawˬ tuˬ yoˬ.—Iˉsaˍyaˆ 25:8; 33:24; Daˍyeˍlaˆ 2:44 gʼaw sheˍ.

 Miˬ guiˬ hkʼoˆ maˇ daꞈ ve chaw htaꞈ Gʼuiˬ sha shiˆ baˬ htaˇ hehꞈ, tuꞈ hkanˍ ve awˬ ceuˬ maˇ kʼawꞈ cawˬ. (Zeˍhpaˍniˆ 2:3) Hkʼaˬ htaˆ te tuˬ le? Chaw yaˇ hkanˍ chehˇ ve awˬ ceuˬ htaꞈ Gʼuiˬ sha tawˇ hkawˇ kʼoˆ taˍ peuˬ. Maˇ daꞈ ve awˬ ceuˬ chi hpehꞈ chehˇ ve htaꞈ nyi kʼo, Gʼuiˬ sha te ve awˬ yanˇ gaˬ la paˇ neˇ ve yoˬ.—2 Tiˆmoˉseˍ 3:1-5 gʼaw sheˍ.

 Gʼuiˬ sha ve awˬ lawn shiˍ tuˬ, yawˇ ve Liꞈ hpu htaꞈ henˇ cawˇ ve yoˬ. Liꞈ hpu lehˬ, ngaˬ hui htaꞈ haꞈ ve awˬ pa bvuhꞈ feu laˇ ve liꞈ hkʼa shuˍ yoˬ. Chi teˇ hkui a shaꞈ teꞈ chehˇ kuiˬ daꞈ la leh, awˬ gʼuˇ suhˍ hpawˇ miˬ guiˬ hkʼoˆ co co taiˍ taiˍ ve a shaꞈ teꞈ chehˇ ve awˬ hkʼaˇ Liꞈ hpu ngaˬ hui htaꞈ kʼoˆ laˇ ve yoˬ. Awˬ tehˬ kʼo, nawˬ Liꞈ hpu na gʼa tuˬ henˇ ve htaꞈ chaw teˇ hpaˍ hpaˍ maˇ dawˇ cawˇ taˬ. Yaꞈ hkʼaˇ, awˬ gʼuˇ suhˍ hpawˇ chi aꞈ kehˉ daꞈ ve a shaꞈ gʼa ve awˬ yanˇ htaꞈ ngaˬ hui maˇ chiˇ baˬ cawˇ.—Tawˇ naˉ ve 29:25; Hpeuꞈ maˍ ve 14:6, 7 gʼaw sheˍ.