WEMŪꞌE HAP 1
Aikowan Tupana kaipywiat sehay wakuat koꞌi.
1. Aikowat asom sehay wakuat koꞌi.
Tupana henoi tehay puo pyi tehay wakuat koꞌi etiat. Kotā̃ e hap toikyꞌesat kahato aiwepīt kahato hap miꞌi pote ahepiat hoꞌopot hap koꞌi toimomã hamuat hawyi tutum hamuat aheig̃neꞌen hap wuatꞌi eꞌāt piat hap. Torānia ti Tupana tunug̃ aikyꞌe kahato haype.—Etimowempāp o Ieremia 29:11.
Torānia puo ti toig̃ saꞌag̃ koꞌi ahū hap koꞌi iꞌewȳte g̃uꞌuro hap koꞌi wy. Korā̃ meig̃muewuat koꞌi morekuaria ȳt timomã kuapꞌi maꞌato Tupana kaipywiat sehay wakuat kahato rakat. Kotā̃ e mesūwat yi totiaria morekuaria toiꞌatupuruk yne hamo miꞌi hawyi atipy tote pyi miꞌi hamuat raꞌyn Morekuatno. Miꞌi hamuat hap ȳt pyaꞌi raꞌyn. Miꞌi hawyi mītꞌīn ȳt teꞌerokenꞌẽꞌi poꞌog̃ hamo iꞌewȳte uweꞌi poꞌog̃ hamo iꞌahū.—Etimowempāp o Isaia 25:8; 33:24; Tanieu 7:14.
2. Kat pote asom sehay wakuat koꞌi hap watikyꞌesat raꞌyn.
Kat pote wahoꞌopot kahato. Ahepiat hoꞌopot hap koꞌi ȳt katꞌi poꞌog̃ hamuat karāmpe Tupana tiꞌatumomã saꞌag̃ nug̃ haria koꞌi hawyi yn hamo. (Sawunia 2:3) Miꞌi hap mesup tān e pote tutunug̃ hamuat raꞌyn miꞌi pote watimohey kuap korā̃ wuat wemoherep hap koꞌi etiat. Tupana Ehay henoi saꞌag̃ koꞌi momã hap eꞌyj̃an mete tuwemoherep kahato aru e hap koꞌi hamo miꞌi pote hoꞌokup kahato mītꞌīn saꞌag̃ nug̃ haria aikotā̃ korā̃ wuat ewy.—Etimowempāp o 2 Timoteu 3:1-5.
3. Kan waku watunug̃.
Waku watuwemūꞌe Tupana Ehay ete. Tupana tum tehay aiwemūꞌe hamo aikyꞌe kahato pote. Tehay puo pyi Tupana henoi aikotā̃ me waku watoig̃neꞌen kuap poꞌog̃ waku puo hap etiat kat asom waku watunug̃ hap etiat iꞌewȳte tohenoi wy aikotā̃ me watāt kuap aheig̃neꞌen wuatꞌi eꞌāt piat hap etiat. Ereig̃neꞌen wuatꞌi eꞌāt pe terān pote waku etiꞌywoporo ewemūꞌe Tupana Ehay etiat hap. Maꞌato iraniaꞌīn eremūꞌe teiꞌo Tupana Ehay ete iꞌatuꞌe hamo.—Etimowempāp o Porowepiu 29:25; Iesui Aru E Hap 14:6, 7. *
^ parágrafo 4 Tupana Ehay pe Tupana ehay wakuat e hap aikotā̃ sehay wakuat Tupana kaipywiat e hap ewy.