E Mizhokjimi me sʼiyazgoji ngekʼua ma go dyⱥtrʼⱥ ne Xoñijomꞹ o tsjaa me na zøø ngekʼua me ra mⱥji ra mimiji. Dya kja ra mezhe ma ra tsjaa ne Xoñijomꞹ me rga zøø, dya kja ra bʼꞹbʼꞹ nrrumꞹ yo ri kjogꞹjidya. Xorꞹge kja Jeremías 29:11.

Yo manrro yo mandajidya dya pjechiji pje ra tsjaji ngekʼua yo ntee ra ka̱ra̱ji na joo, bʼꞹbʼꞹ kʼo potrʼꞹji o dyojui, kʼo kjaji chu̱ʼu̱ xo ri sodyeji ñe ri tu̱ji. Ngekʼua e Mizhokjimi mama ra chjotꞹ yo manrro kʼo mandajidya kja ne Xoñijomꞹ, dya kja ra mezhe ra zⱥdʼⱥkʼo. E Mizhokjimi mama kʼo me na joo, angeze mama ra ñɇme o Reino ngekʼua ra manda kja ne Xoñijomꞹ, akjanu yo ntee ra ka̱ra̱ji na joo. Xorꞹge kja Isaías 33:24; Daniel 2:44; Apocalipsis 21:4.

Kja ne Biblia mama ke ma e Mizhokjimi ra chjotꞹ yo na sʼonte dya kja ra supjrejima (Sofonías 2:3). E Mizhokjimi dya kja ra mezhe ra tsjaayo. Kja ne Biblia mama ke ma rgua kjogꞹ na punkjꞹ kʼo na sʼoo kja ne Xoñijomꞹ dya kja ro mezhe ro zⱥdʼⱥkʼo. Xorꞹge kja 2 Timoteo 3:1-5.

E Mizhokjimi me nezgoji, o dyakoji ne Biblia ngekʼua ra pa̱rgoji jaga kjaa angeze. E Mizhokjimi ngeje nzakja na tata kʼꞹ me nee o trʼii, opjꞹ na skuama kjanu penpe ngekʼua kʼe trʼii ra mba̱ra̱ pje ra tsjaa o tata. Ga kjanu e Mizhokjimi o dyakoji ne Biblia, xitsiji jarga minji na joo ñe pje ra kjaji ngekʼua ra minji kja ne Xoñijomꞹ ma me rga zøø. Pe ma ra jitsʼiji pje mama ne Biblia ra bʼꞹbʼꞹ ntee kʼꞹ ra ꞹnkʼꞹ, pe nutsʼkʼe dya ri jyɇzi ri xorꞹ ne Biblia, me na joo kʼo nee e Mizhokjimi ke ri pa̱rge. Xorꞹge kja Proverbios 29:25; Apocalipsis 14:6, 7.