Modimo o nyaka gore batho ba thabele bophelo mo lefaseng. O bopile lefase le dilo tšohle tšeo di lego go lona ka gobane a rata batho. Go se go ye kae, o tla gata mogato ka go nea batho ba dinageng ka moka bokamoso bjo bokaone. O tla imolla batho dilong tšeo di bakago tlaišego.​—Bala Jeremia 29:11.

Ga go mmušo woo o ilego wa atlega go fediša bošoro, bolwetši goba lehu. Eupša go na le ditaba tše dibotse. Go se go ye kae, Modimo o tla dira gore Mmušo wa gagwe o tšeele mebušo ya batho legato. Balata ba wona ba tla ba le khutšo le boemo bjo bobotse bja tša maphelo.​—Bala Jesaya 25:8; 33:24; Daniele 2:44.

Tlaišego e tla fela ge feela Modimo a tloša batho ba babe mo lefaseng. (Tsefanya 2:3) Seo se tla direga neng? Lentšu la Modimo le boletše e sa le pele ka maemo ao ga bjale a tlaišago batho. Ditiragalo tša gona bjale di bontšha gore nako ya Modimo ya go gata mogato e kgauswi.​—Bala 2 Timotheo 3:1-5.

Re swanetše go ithuta ka Modimo go tšwa Lentšung la gagwe, Beibele. E swana le lengwalo leo re le ngwaletšwego ke tate yo lerato. E re botša kamoo gona bjale re ka phelago gakaone le kamoo re ka thabelago bophelo bjo bo sa felego lefaseng nakong e tlago. Ke therešo gore ba bangwe ba ka no se rate taba ya gore o thušwa go kwešiša Beibele. Eupša o se ke wa dumelela motho a go thibela go ba le bokamoso bjo bokaone.​—Bala Diema 29:25; Kutollo 14:6, 7.