Osolobrugwẹ ọ guọlọre taghene ihworho i riẹ omamerhomẹ uvuẹn akpọ na. Ọ ma akpọ na rhẹ ekwakwa re ha uvuien, nime ọye o vwo ẹguọlọ kpahen ituakpọ. Phẹrẹkpẹ ọye ọnọ kpare udjoghwẹ ọnọ ha omamọ akpọ harẹn ihworho ephian uvuẹn otọrakpọ na. Ọye ono tiẹ oborẹ ọ suẹ oja-ẹriọ harẹn ituakpọ nie.—Se Jeremiah 29:11.

Ovwo usun owuorowu rọ sabu tiẹ ozighi, emiamo, rhẹ uhwu nie ne-e. Jọrẹn iyẹnrẹn esiri ọ havwiẹ. Phẹrẹkpẹ Osolobrugwẹ ọnọ ha usun ọnẹyen wene usun ituakpọ. Ihworho re ha obotọre usun ọnẹyen na, ena riẹ omamerhomẹ ọrẹ ufuoma rhẹ ugboma ọkpokpọ.—Se Isaiah 25:8; 33:24; Daniel 2:44.

Oja-ẹriọ ono vwo oba ọke rẹ Osolobrugwẹ o tiẹ evwọkon nie ne. (Zephaniah 2:3) Ọke ọgo ọnọ phia? Ẹmro Osolobrugwẹ ọ tẹmro kpahen ekwakwa re zonzon ituakpọ ẹdọke ọrẹ inyenana. Iyẹnrẹn rhẹ ekwakwa ọwan a mẹrẹn odje phia taghene ọke Osolobrugwẹ ọnọ kpare udjoghwẹ o ti kẹrẹ ne.—Se 2 Timothy 3:1-5.

Ọwan ine yono kpahen Osolobrugwẹ nẹ uvuẹn Ẹmro ọnẹyen, Baibol na rhe. Ọ họhọ ileta ọsẹ ro vwo ẹguọlọ ọ ha vwe emọ yen. Ọ ta rẹn ọwan kpahen oborẹ ene ru sabu nyerẹn omamọ akpọ ọke ọnana rhẹ arhọ ri bẹmẹdẹ ọke rọsa na. Itiọrẹ-urhomẹmro, evwan ono biomu ihworho ezẹko nime wa mẹrẹn userhumu wu ne vwo ẹruọ i Baibol na. Ọrẹn, wu ne jẹ uphẹn ọrana vabọ-ọ, nime Osolobrugwẹ o ve ive omamọ akpọ ro no to obọ ọke rọsa na.—Se Proverbs 29:25; Revelation 14:6, 7.