Koht kin ketin kupwurki aramas en perenki mour nin sampah. E ketin kapikada sampah oh audepe kan koaros pwehki e ketin poakohng aramas. Kereniongehr e pahn ketikihong aramas wasa koaros mour mwahu ni ahnsou kohkohdo. E pahn ketikihsang aramas soahng kan me kin kahrehda lokolok.​—Wadek Seremaia 29:11.

Sohte koperment ehu me kak kihsang tiahk lemei, soumwahu, oh mehla. Ahpw mie rohng mwahu. Ahnsou keren, Koht pahn ketin wiliankihdi koperment en aramas koaros sapwellime koperment. Towe kan pahn ahneki popohl oh roson mwahu.​—Wadek Aiseia 25:8; 33:24; Daniel 2:44.

Lokolok pahn imwisekla ihte ni ahnsou me Koht pahn ketikihsang aramas suwed nin sampah. (Sepanaia 2:3) Iahd me met pahn wiawi? Mahsen en Koht kohpadahr irair kan me kin kahpwalihala aramas ahnsou wet. Soahng suwed kan me kin wiawi nin sampah kin kasalehda me ahnsou me Koht pahn ketin mwekid kerendohr.​—Wadek 2 Timoty 3:1-5.

Kitail anahne sukuhlki duwen Koht sang sapwellime mahsen, Paipel. E duwehte kisinlikou ehu ong kitail sang rehn pahpa limpoak men. E kin padahkihong kitail ia duwen atail pahn ahneki mour nsenamwahu ahnsou wet oh ia duwen atail pahn ahneki mour soutuk nin sampah ahnsou kohkohdo. Mwein ekei sohte pahn mwahuki ken ale sawas pwe ken wehwehkihla Paipel. Ahpw Koht ketin inoukihda me kitail kak ahneki mour nsenamwahu ahnsou kohkohdo kahrehda kitail en dehr mweidohng meteikan en kauhkitaildihsang sukuhlki duwen met.​—Wadek Lepin Padahk 29:25; Kaudiahl 14:6, 7.