Ri Ajawaxel kraj che ri winaq kkiriq kikotemal pa kikʼaslemal. Rumal ri uloqʼoqʼenik chike ri winaq xubʼan ri uwach Ulew xuqujeʼ ronojel ri kʼo chupam. Xa jubʼiqʼ chi kraj rech kresaj ronojel ri jastaq che kuya kʼaxkʼolil, rech kkiriq utzil ri winaq rech ronojel tinamit. Chasikʼij uwach Jeremías 29:11.

Kʼot nijun ajqʼatal tzij kunaq che resaxik ri chʼoj, ri yabʼil xuqujeʼ ri kamikal. Tekʼuriʼ kʼo utzalaj täq jastaq kpe na: xaq jubʼiqʼ chi kraj, ri Ajawaxel kusachisaj na uwach konojel ri kiqʼatbʼal tzij ri winaq xuqujeʼ kukoj ri uqʼatbʼal tzij areʼ. Ri rajpatanelabʼ kkiriq na utzilal xuqujeʼ kkiriq ta chi yabʼil. Chasikʼij uwach Isaías 25:8; 33:24, xuqujeʼ Daniel 2:44.

Rech kʼot chi kʼaxkʼolil, rajawaxik che ri Ajawaxel keresaj cho ri uwach Ulew konojel ri e itzel winaq (Sofonías 2:3). ¿Jampaʼ keresaj? Ri Loqʼalaj Pixabʼ xuya lo ubʼixik chirij ri jastaq che sibʼalaj kuya kʼaxkʼolil chike ri winaq kimik. Ri itzelal che tijan kbʼan kimik are kukʼutu che xa jubʼiqʼ chi kraj che ri Ajawaxel kukʼex ri jastaq. Chasikʼij uwach 2 Timoteo 3:1-5.

Rajawaxik kqasikʼij uwach ri Loqʼalaj Pixabʼ rech kqetaʼmaj chirij ri Ajawaxel, rumal che ri Loqʼalaj Pixabʼ xaq junam rukʼ jun wuj kutaq jun utzalaj tat chike ri ralkʼwal. Kubʼij chaqe ri kqabʼan che uriqik ri kikotemal pa ri qakʼaslemal kimik xuqujeʼ ri rajawaxik kqabʼano rech kqariq ri kʼaslemal che kʼot ukʼisik pa ri petinaq. Qastzij wi che konojel täj utz kkilo che kawetaʼmaj chirij ri Loqʼalaj Pixabʼ. Xaq mayaʼo che katqʼatex che retaʼmaxik chirij ri Ajawaxel, rumal che kubʼij che kpe na jun utz kʼaslemal. Chasikʼij uwach Proverbios 29:25 xuqujeʼ Apocalipsis 14:6, 7.