Tucui gentecuna cushilla causachunmi Diosca munan. Gentecunata cꞌuyashcamantami Diosca Allpatapish, caipi tucui tiyashcacunatapish rurarca. Tucui gentecuna cushilla causachunmi Diosca ñalla tucui llaquicunata tucuchinga. Jeremías 29:​11-ta rezapai.

Mana alli ruraicunata, ungüicunata, huañuitapish gobiernocunaca mana tucuchishcachu. Shinapish alli huillaicunami tiyan: Diosca ñallami tucui mandajcunata tucuchishpa, Jesús cai pachata mandachun churanga. Diosta cazujcunaca cushilla, nanaicuna illajmi causanga. Isaías 25:8; 33:​24; Daniel 2:​44-ta rezapai.

Millai gentecunata Dios tucuchijpimi llaquicunaca tucuringa (Sofonías 2:3). ¿Ima horashi chaitaca ruranga? Bibliapica cunan punllacunapi llaquicuna tiyanatami huillacun. Chai llaquicunaca millai gentecunata Dios ñalla tucuchina cashcatami ricuchin. 2 Timoteo 3:​1-5-ta rezapai.

Bibliapimi Diosmanta yachana canchij. Bibliaca shuj cꞌuyaj yaya cachashca carta shinami can. Cunan punllacunapi cushilla causangapaj, shamuj punllacunapipish huiñaita causangapaj imata rurana cashcatami Bibliaca yachachin. Bibliamanta yachacujpica mana tucuicunachu cushicunga. Shinapish, yachashpa catinataca mana saquinachu cangui. Yachashpa catishpaca sumaj bendicioncunatami chasquingui. Proverbios 29:25; Apocalipsis 14:​6, 7-ta rezapai.