LEHONA 1
He ā te Tala Lelei?
1. He ā te tala lelei mai te Atua?
E fofou te Atua ke ola fiafia nā tino i luga o te lalolagi. Na fai e ia te lalolagi ma nā mea uma e i ei auā e alofa ia ki nā tino uma. Kua toeitiiti gaoioi ia ke kaumai he lumanaki lelei mo nā tino i nā fenua uma. Ka ia fakamapu nā tino uma mai nā mafuaga e mafatia ai.—Faitau te Ielemia 29:11.
E hēai he mālō na mafai oi kavekehe te fakahāuā, tauale, pe ko te oti. Kae e i ei te tala lelei. Kua toeitiiti hui e te Atua nā mālō o tagata uma ki tona mālō. Ka fiafia nā tagatāfenua ki te fīlēmū ma te ola mālōlō.—Faitau te Ihaia 25:8; 33:24; Tanielu 2:44.
2. Aiheā e fakavave ai te tala lelei?
Ko nā mafatiaga e fakaiku kāfai e fakamamā e te Atua te lalolagi o nā tino kino. (Hefanaia 2:3) Ko āfea ka tupu ai? Na valoia e te Kupu a te Atua nā tulaga e fakamataku ai nā tino uma o te lalolagi i te taimi nei. Ko nā mea tutupu i nā aho nei e fakailoa mai ai kua tafapili mai te taimi ka gaoioi ai te Atua.—Faitau te 2 Timoteo 3:1-5.
3. He ā te tatau ke fai e ki tatou?
E tatau ke akoako ki tatou e uiga ki te Atua mai tana Kupu, te Tuhi Paia. E vē ko he tuhi mo ki tatou mai he tamana alofa. E taku mai ki a te ki tatou te auala e maua ai te olaga fiafia i te taimi nei ma e vēhea oi maua te ola fakavavau i luga o te lalolagi i te lumanaki. E moni, hōvē e i ei nā tahi tino e hē fofou ke maua e koe te fehoahoani ke malamalama ai i te Tuhi Paia. Kae ona kua folafola mai e te Atua e mafai ke maua e ki tatou he lumanaki lelei, e hē tatau ke fakataga iē tahi ke fakavaivai ki tatou mai te akoako e fakatatau ki ei.—Faitau te Fataoto 29:25; Fakaaliga 14:6, 7.
