Xikwembu xi lava leswaku vanhu va tiphina hi vutomi emisaveni. Xi tumbuluxe misava ni swilo hinkwaswo leswi nga eka yona hikuva xi rhandza vanhu. Ku nga ri khale xi ta teka goza leswaku vanhu va matiko hinkwawo va va ni vumundzuku lebyinene. Xi ta herisa swilo hinkwaswo leswi vangelaka vanhu ku xaniseka.—Hlaya Yeremiya 29:11.

Ku hava hulumendhe leyi tshameke yi kota ku herisa madzolonga, mavabyi kumbe rifu. Kambe ku ni mahungu lamanene. Ku nga ri khale, Xikwembu xi ta siva tihulumendhe hinkwato ta vanhu hi hulumendhe ya xona. Vanhu lava nga ta fumiwa hi hulumendhe ya xona va ta tiphina hi ku rhula naswona va ta va ni rihanyo lerinene.—Hlaya Esaya 25:8; 33:24; Daniyele 2:44.

Ku xaniseka ku ta hela loko Xikwembu xi herisa vanhu lavo biha emisaveni. (Sofaniya 2:3) Xana sweswo swi ta endleka rini? Rito ra Xikwembu ri profete hi swiyimo leswi xungetaka vanhu sweswi. Swilo swo biha leswi humelelaka emisaveni swi kombisa leswaku nkarhi wa Xikwembu wa ku teka goza wu tshinele.—Hlaya 2 Timotiya 3:1-5.

Hi fanele hi dyondza hi Xikwembu eRitweni ra xona ku nga Bibele. Yi fana ni papila leri hi tsaleriweke rona hi tatana la nga ni rirhandzu. Yi hi byela ndlela leyi hi nga hanyaka vutomi byo antswa ha yona sweswi ni ndlela leyi hi nga byi kumaka ha yona vutomi lebyi nga heriki emisaveni enkarhini lowu taka. I ntiyiso leswaku vanhu van’wana a va nge swi tsakeli loko va ku vona u pfuniwa ku twisisa Bibele. Kambe a hi fanelanga hi pfumelela van’wana va hi heta matimba leswaku hi nga dyondzi hi vumundzuku lebyinene.—Hlaya Swivuriso 29:25; Nhlavutelo 14:6, 7.