E manako te Atua ke maua ne tino a te ola i te lalolagi. Ne faite ne ia a te lalolagi mo mea katoa i ei ona ko te mea e alofa a ia ki tino. E se leva nei kae ka gasuesue a ia ke tuku mai ne ia se olaga tai ‵lei atu mō tino i fenua katoa i aso mai mua nei. Ka fakasaoloto ne ia a tino mai i māfuaga o logo‵maega.​—Faitau te Ielemia 29:11.

E seai eiloa se pulega ne iku manuia ana taumafaiga i te fakagataga o fakasauaga, masaki, io me ko te mate. Kae e isi eiloa se tala ‵lei. Ko pili fua nei o sui ne te Atua a pulega a tino ki tena pulega eiloa. Ka maua eiloa ne tino mai lalo i tena pulega a te filemu mo te malosi ‵lei.​—Faitau te Isaia 25:8; 33:24; Tanielu 2:44.

Kafai ko oti ne faka‵ma ne te Atua a te lalolagi mai i tino ma‵sei, ka fakagata atu i ei a logo‵maega. (Sefanaia 2:3) Ka tupu mafea a te mea tenā? Ne ‵valo mai ne te Muna a te Atua a fakanofonofoga kolā ko fakamatakutaku atu nei ki tino. E fakaasi mai ne mea ‵tupu i aso nei me ko pili mai eiloa a te taimi e gasuesue ei a te Atua.​—Faitau te 2 Timoteo 3:1-5.

E ‵tau o tauloto tatou e uiga ki te Atua mai tena Muna, ko te Tusi Tapu. E fai eiloa e pelā me se tusi mai i se tamana alofa ki a tatou. E fai mai i ei a te auala ke maua nei ne tatou se olaga tai ‵lei atu mo te ola se-gata-mai i te lalolagi i aso mai mua. E tonu, e mafai o se fia‵fia a nisi tino me ko maua ne koe se fesoasoani ke malamalama i te Tusi Tapu. Kae ko te avanoaga ke maua se olaga tai ‵lei atu i aso mai mua, se mea telā e se ‵tau o galo atu i a tatou.​—Faitau te Faataoto 29:25; Fakaasiga 14:6, 7.