Бурган бисти аас-кежиктиг болзун деп күзеп турар. Ол биске ынак болгаш, черни база ында бар шупту чүвени чаяап берген. Ол удавас шупту кижилерниң чуртталгазын эки талаже өскертиптер. Делегейге моон соңгаар хилинчек-човулаң турбас. (Номчуптуңар: Иеремия 29:11.)

 Чаңгыс-даа чазак күчүлелди, аарыг-аржыкты болгаш өлүмнү соксадып шыдаваан. Ынчалза-даа эки медээ бар. Удавас Бурган черде бар бүгү чазактарны Бодунуң чагыргазы-биле солуур. Шупту улус тайбың чурттаар, олар эки кадыкшылдыг болур. (Номчуптуңар: Исайя 25:8; 33:24; Даниил 2:44.)

 Бурган чер кырын каржы кижилерден арыглап кааптарга, чүгле ынчан хилинчек-човулаң соксаар (Софония 2:3). Ол чүүл кажан болур? Делегейде болуп турар болуушкуннарны Бурганның Сөзүнде баш бурунгаар бижип каан. Амгы болуушкуннар Бурган удавас хөделип эгелээр деп тода айтып турар. (Номчуптуңар: 2 Тимофейге 3:1—5.)

 Бурганны Ооң Сөзү Библиядан билип алыры биске чугула. Библияны ынакшылдыг аданың ажы-төлүнге чагаазынга дөмейлеп болур. Чуртталганы ам безин канчаар экижидип алырын база келир үеде чер кырынга мөңге амыдыралды канчаар алырын ында бижээн. Библияны өөренириңерге чамдык улус ол чүүлге таарзынмайн баар чадавас. Ынчалза-даа кайгамчыктыг эки байдалга мөңге чурттаар арганы чидирип алыры, аажок улуг чидириг-дир. (Номчуптуңар: Чугаалар 29:25; Ажыдыышкын 14:6, 7.)