Dios tʼuhlak wichi yen lekajyaja mʼak toj ihi. Hop toj ihumin wichi, yenlhi pʼante Honhat wet nilhokej mʼayhay toj iche. Atofwiyetʼa che itayhthila mʼayhay toj tamenej toj wichi letelaythayajay ihiche hopkhilak nilhokej wichi lhayʼe lhip toj is mʼak toj ihihla. Yahyen Jeremías 29:11.

Ihichetʼa nʼoniyatyaj che iwoye pʼantek inofwat nʼofwitseyaj toj iyej wichi, nʼotʼinhayajay lhayʼe nʼotʼilek. Mat iche nʼosilotyaj toj isis toj nʼofwel namhomche toj atofwiyetʼa che Dios itayhthila nilhokej nʼoniyatyajay toj ihonhatena wet itihlaʼpe honhat leniyatyaj. Laka wichi yenla lekajyaja toj ihi letamsek wet nemla tʼinhayajay iyej lhamel. Yahyen Isaías 25:8; 33:24 wet Daniel 2:44.

Dios is che itayhat wichi toj niʼisa toj ihonhatena hopkhilak noj toj iche nʼotelaythayajay (Sofonías 2:3). ¿Atsi lewhay che iwohiyela toja? Dios Lhomtes yome pʼante toj ihichela mʼayhay toj iche athana toj tamenej toj wichi ihi mʼayhay toj aytesiche. Mʼayhayna toj nʼal hope nʼotetnek toj inʼalit toj tatay lhimpaj wet Dios iwohiyela letichunhayaj. Yahyen 2 Timoteo 3:1-5.

Is che nalhaichufwenej Dios Lhomtes hopkhilak nahanej chi malhyej (ep hote) lham, lhomtesna malhyej iwoye hop carta toj nʼojcha toj humnhatsaj ilesayen wet ithate leles. Nʼolhomethi ifwel namhomche mʼak toj iwoyek nawoye hopkhilak nen lhakajyaja mʼak toj nehi athana wet atsi toj is che nawoye hopkhilak lewhay toj tatay alhoho nakatej lhawʼatshancheyaj toj naj lepesa. Mat, is che lehanej toj nilhokhiyejtʼala wichi toj yen lekajyaja toj iche iyhaj toj tachʼot ame toj alechufwenej Dios Lhomtes. Mat is che lenuhla tajtso toj aikʼefwhatcha, tsi wujpe mʼayhay toj isis toj hiwʼenla amho hop toj tamenej toj matche toj laha ihi che alekhajyenpe. Yahyen Proverbios 29:25 wet Apocalipsis 14:6, 7.