FIANARAN̈A 1
Ino ma Vaovao Tsara Zen̈y?
1. Ino ma vaovao baka amy Zan̈ahary io?
Tiany Zan̈ahary ho ravoravo atsika mipetraka ambony tany eto. Zen̈y nahavy izy niasa tany ty ndreky nan̈amia raha jiaby ilaintsika. Tsy ho ela izy han̈adoso raha jiaby manahiran̈a atsika.—Vakia Jeremia 29:11.
Tsiary nisy fanjakan̈anolombelon̈o nahavita nan̈adoso pangalatra ndreky pamono olo, aretin̈y ndreky fahafatesan̈a. Ty misy vaovao tsara baka amy Zan̈ahary: Tsy ho ela izy han̈adoso fanjakan̈anolombelon̈o jiaby. Fanjakan̈anany zaraiky fo hitondra tany jiaby ty. Olo amy zen̈y hiadan̈a ndreky tsy harary eky.—Vakia Isaia 25:8; 33:24; Daniela 2:44.
2. Nan̈ino ma atsika tsy tokony hirekireky han̈ambara izio?
Izikoa olo ratsy fan̈ahy jiaby ambony tany eto adosony Zan̈ahary, jaly tsy ho hisy eky. (Zefania 2:3) Atsika tsy tokony hirekireky han̈ambara izio, fotony raha jiaby nambarany Baiboly ahaizan̈a raha io efa marikitry, efa miboaka aby.—Vakia 2 Timoty 3:1-5.
3. Ino ma raha tokony hataonao?
Anao tokony hianatra Baiboly, baka mahay raha momba Zan̈ahary. Baiboly io mira taratasy baka amy baba araiky tia zanaka in̈y. Ambarany Zan̈ahary ao raha mampasambatra rango izioty ndreky raha tokony hatao, baka anao ho velon̈o tsisy farany. Tsy olo jiaby ho ravoravo mahita anao mianatra Baiboly. Izikoa tianao hahazo raha tsara jiaby hamiany Zan̈ahary, tohiza fo fianaranao Baiboly.—Vakia Ohabolana 29:25; Apokalypsy 14:6, 7.
Mety ho Tianao Koa
RAHA MOMBA ZAHAY
Nan̈ino ma Anao Tokony Hianatra Baiboly?—Video Lava
Baiboly man̈amia valiny fan̈otanian̈a manahiran̈a sain̈inolo maro erantany. Asa tianao koa hahazo valiny fan̈ontanian̈anao?
