Lufunjisho 2
Lesa ye ñanyi?
1. Mambo ka o twafwainwa kupopwelanga Lesa?
Lesa wa kine ye Mulenga walengele bintu byonse. Kechi uji na ntendekelo nangwa mpelo ne. (Salamo 90:2) Lesa yo Nsulo ya mambo awama aji mu Baibolo. (1 Timoti 1:11) Byo kiji kuba’mba Lesa yo nsulo ya bumi, twafwainwa kupopwelatu aye yenka kwapwa.—Tangai Lumwekesho 4:11.
2. Nanchi Lesa uji byepi?
Kafwako muntu wakimonapo Lesa ne, mambo Mupashi, kino kilumbulula’mba aye wapusana na bilengwa bya pano pa ntanda. (Yoano 1:18; 4:24) Nangwa byonkabyo, twakonsha kuyukila byubilo bya Lesa ku bintu byo alenga. Kyakumwenako, bipangwa ne buluba bwapusana pusana, bimwesha butemwe ne maana anji. Kubaya kwa biji mwiulu kumwesha bulume bwanji.—Tangai Loma 1:20.
Kabiji twakonsha kuyuka bulongo byubilo bya Yehoba kupichila mu kutanga Baibolo. Kyakumwenako, Baibolo witubula bikeba Lesa ne byo ashikwa, byo amona bantu ne byo oba na bintu byapusana pusana.—Tangai Salamo 103:7-10.
3. Nanchi Lesa uji na jizhina nyi?
Yesu waambile’mba: “Tata wetu wa mwiulu, Jizhina jenu jizhile.” (Mateo 6:9) Nangwa kya kuba Lesa uji na mazhina a mushingi avula, pano bino ujitu na jizhina jimo. Mu milaka yavula ntelelo yaenda na kupusana. Mu Kikaonde jitelwa’mba: “Yehoba.”—Tangai Salamo 83:18.
Mu Baibolo, jizhina ja Lesa bejifumyamo ne kupingizhamo byambo bya mushingi nabiji Nkambo nangwa Lesa. Pano bino, Baibolo byo anembelwenga jizhina ja Lesa janembelwemo bimye nobe 7,000. Yesu wayukanyikishe jizhina ja Lesa byo afunjishanga bantu pe Lesa.—Tangai Yoano 17:26.
4. Nanchi Yehoba wituta muchima nyi?
Byonka biji nsemi watemwa baana banji, ne Lesa naye wata bingi muchima bantu babena kuyanda
Nanchi kuvula kwa buyanji kumwesha‘mba Yehoba kechi wituta muchima nenyi? Bantu bamo bamba’mba buyanji lweseko lwa Lesa, buno ke bubela bufiita.—Tangai Yakoba 1:13.
Lesa wapa bantu lūsa lwa kwifuukwila. Nanchi kechi tumusanchila Lesa pa kwituswisha kwifuukwila kumupopwela nenyi? (Yoshua 24:15) Buyanji bwavula mu ntanda mambo bantu basalapo kuba bakwabo bintu byatama. Yehoba kimukola bingi ku muchima pa kumona nshiji ya uno mutundu.—Tangai Ntendekelo 6:5, 6.
Yehoba ke Lesa wituta bingi muchima. Ukeba’mba twikalenga bulongo. Katatakatu Yehoba akengijishe Yesu kufumyapo buyanji ne babi. Pa kino kimye, uji na bishinka byamulengela kuswisha buyanji kutwajijila pa kakimye kacheche. Mu kitango 8, tukafunda ene mambo Lesa o aswishisha buyanji.—Tangai 2 Petelo 2:9; 3:7, 13.
5. Twakonsha kufwenya byepi kwipi ne Lesa?
Yehoba ukeba’mba tufwenye kwipi ne aye kupichila mu lulombelo. Wituta muchima atweba bonse pa muntu pa muntu. (Salamo 65:2; 145:18) Waswa kwitulekelako mambo. Umona byo twibikako kuba kyaswa muchima wanji, nangwa kya kuba kimye kimo tukankalwa kwikyuba. Onkao mambo, twakonsha kwikala na bulunda bwawama ne Lesa nangwa kya kuba twibambulwa kulumbuluka.—Tangai Salamo 103:12-14; Yakoba 4:8.
Byo kiji kuba’mba Yehoba yo nsulo ya bumi bwetu, twafwainwa kumutemwa na muchima wetu yense. (Mako 12:30) Byo musakumweshanga byo mwatemwa Lesa kupichila mu kufunda pe aye ne kuba kyaswa muchima wanji, mukafwenya kwipi ne aye.—Tangai 1 Timoti 2:4; 1 Yoano 5:3.
