PALAJAHAN 3
Apaké Orti Luung Ené Tekané Mula Uli Tuhan?
1. Nyénké ané Ngarang Cakepan Suci?
Orti luung ané ngorahang manusané lakar idup langgeng di guminé suba katulis di Cakepan Suci. (Kidung 37:29) Cakepan Suci utawi Alkitab isiné 66 buku. Tuhan nganggén 40 anak muani-muani ané satia nulisang ento makejang. Limang buku ané simalu katulis baan nabi Musa sekitar 3.500 tiban ané suba liwat. Buku siduri katulis baan rasul Yohanes sekitar lebian tekén 1.900 tiban ané suba liwat. Keneh nyénké ané tulisanga tekén para penulis Cakepan Suciné? Tuhan masabda ajak para penulis Cakepan Suci nganggé roh sucin Ida. (2 Samuel 23:2) Para penulisé nulisang sabdan Idané, boyaja kenehné padidi. Dadiné, Yehuwa ané ngarang Cakepan Suci.—Baca Pararudan 34:27; 2 Timotius 3:16.
2. Apa krana iraga bisa pracaya yéning Cakepan Suciné beneh?
Iraga pracaya yéning Cakepan Suci asalné uli Tuhan krana suba ngemaang nubuat utawi nyebutang masa depan ané bisa kapracayain lan terperinci. Tusing ada manusa ané bisa malaksana buka kéto. (Yosua 23:14) Tuah Ida ané Mahakuasa ané bisa seken-seken nawang masa depan idup manusané.—Baca Nabi Yesaya 42:9; 46:10.
Buku uli Tuhan mula tusing ada ané matuhin. Miliaran Cakepan Suci suba kacétak lan suba ada di penyatusan basa. Yadiapin suba lawas, Cakepan Suci adung ajak buku pengetahuan. Yapinja penulisné ajak 40, isin Cakepan Suciné tusing taén matungkasan. * Cakepan Suci masih nulis unduk tresna, sipat ané tuah bisa kajelasang baan Tuhan ané welas asih. Bukuné ené ngelah kuasa ngubah kaidupan anaké apang ngancan ngeluungang. Ené dadi bukti yéning Cakepan Suci seken-seken Sabdan Ida.—Baca 1 Tesalonika 2:13.
3. Apa isin Cakepan Suciné?
Cakepan Suciné misi orti luung yéning Ida nyediaang masa depan ané bagia. Cakepan Suci nyelasang apa krana taman ané asri tongos manusa kapertama utawi pirdaus ilang. Lan Cakepan Suci nyelasang kénkén carané pirdaus bisa buin ada.—Baca Wahyu 21:4, 5.
Cakepan Suci misi hukum, prinsip lan pitutur. Cakepan Suci masih nyatet carané Tuhan maurusan ajak manusa, ené nunjukang sipat Idané. Dadiné, Cakepan Suci bisa ngaénang iraga nawang indik Tuhan lan carané iraga bisa dadi sawitrané.—Baca Kidung 19:7, 11; Yakobus 2:23; 4:8.
4. Kénkén carané iraga bisa nawang isin Cakepan Suci?
Carané malajahin bukuné ene, patuh buka caran para nabi ngajahang Cakepan Suci apanga ragané bisa ngerti. Ipun macaang ayat-ayat Cakepan Suci lan nerangang apang bisa ”ngresep ring daging Cakepan Sucine”.—Baca Lukas 24:27, 45.
Tusing ada ané melahan tekéning orti luung uli Tuhan. Nanging nyatané, ada ané tusing demen lan gedeg ningehang. Eda ento sangetange. Ragané lakar maan idup langgeng yéning terus malajah unduk Tuhan.—Baca Yohanes 17:3.
^ par. 3 Tingalin Buku bagi Semua Orang (ada di basa Indonesia).
