ˈTɩtɩ a -tɩtɩɩ -yɩ nʋä nɩɩ, nɩkpa yi ˈkwädlɩnɩ mäˈä dʋdʋ ˈwʋ -bhölɩnɩ, cɛlɩ -mä Biblë ˈmö. (Psaume 37:29) -Mä ɛ ˈmö a bɔgwɩɩ -bhli 66. Nɩkpa a 40 a sɛ, -wa ˈtɛɛnɩɛ Lagɔ dlɩ teɲii ˈmö ɔ ghlɛnɩɛ ˈmö ˈn wa yiɛ Biblë ˈcɛlɩ. Tɛkäbɔgwɩɩ ngbï -kpɔ, Moyizɩ mɔɔ ˈcɛliɛ, -lɛ a ˈylʋbö a 3.500 dɛˈɛ. ˈGbë-bhlenɩ-bɔgʋʋ, Zezwii a tietieɲɔ Zaah mɔɔ ˈcɛlʋä. Ɔ ˈcɛlʋä, ˈylʋbö a 1.900 dɛˈɛ. -Wa ˈcɛlɩɛ Biblë, -ɔɲɩ wɛlɩɩ wa ˈcɛlɩ ɔ ˈnɩ? Lagɔ ˈa ˈwugɔmʋʋ, mʋʋ bhïlanuëë ˈmö ˈn wa yiɛ Biblë ˈcɛlɩ. (2 Samuel 23:2) Lagɔ ˈa wɛlɩɩ ˈmö wa ˈcɛlɩɛ, maa ɛˈɛ -bhö waˈbhï a -nii mi. Zaa, Zoova mɔɔ -lɛ Biblë a ˈwälaɲɔ mɔ.—-A zɛlɩ 2 Timotee 3:16 -ɲɛ 2 Piɛlɩ 1:20, 21 ˈsɔ ˈmö.

A nɩ ylɛ video -Mɔ -lɛ ɔ Biblë a ˈwälaɲɔ ˈnɩ?

-A -yi sɛ nɩɩ, Lagɔ mɔɔ ˈwälaa Biblë. Ɛˈɛ -bhö ɲɩasɛ, maa -lii ˈwuë ɛ sɛnɩɛ ˈmö, ˈyli yɩ ˈwlʋnɩɛ klɩpaa. Nɩkpɛ ˈnɩɛ bhɛnɩ ɔ ˈkä -sɩbhä ˈzʋmö. (Josué 23:14) Lagɔtapɛ a ˈyize mɔɔ bhɛnɩɛ ɔ ˈkä ˈsaa ˈkää bhäla nɩkpa a dɔˈwʋ ˈyli ˈwlʋnɩ ˈmö -sɛnɩ.—-A zɛlɩ Isaïe 42:9 -ɲɛ Isaïe 46:10 ˈsɔ ˈmö.

-A yɩbhä nɩɩ, ˈbɔgʋ -wʋ ˈbhöönɩɛ Lagɔ ˈmö nɩ -wʋ ˈwʋ dɛ, ˈn -sɩbhä Biblë -wʋä. Wa bia Biblïa a -bɛ, -yɩ cɛlɩnɩɛ gbɩ a -bɛ ˈmö. Wa yɛ Biblë ˈcɛlɩ -lɛ yɛ ˈmö gwälɛ abhlɩ, maa ɛ -ɲɛ sɩasɩ ˈa wɛlɩɩ mönɩ yɔwʋ. Nɩkpa a 40 -wa ˈcɛlɩɛ Biblë, wɛlɩɩ wa ˈcɛlɩɛ, ˈwlʋnɩ yɩ ˈwlʋnɩɛ. * ˈSaa Biblë -sɛnɩɛ ˈmö -wawʋ a dɛ, mii tulaa nɩɩ, Lagɔ -ɔ -waɲɩɛ, mɔɔ -lɛ Biblë a ˈwälaɲɔ mɔ. ˈN ɛ zlɔmanɩɛ nɩkpa ˈmö wa ˈkä -li a -lii nʋ. -Miˈla ˈwuë mii kää ˈŋlɩ, ˈn nɩkpa a -bɛ kɩˈɛ dlɩ ˈwʋ nɩɩ Biblë, Lagɔ ˈa wɛlɩɩ, ˈmö ɛ glɩnɩɛ -tiamö.—-A zɛlɩ 1 Tesaloniikö 2:13 ˈmö.

A nɩ ylɛ video Sɛɛ -a ˈkɩ ɔ dlɩ ˈwʋ -kä nɩɩ, Biblë kä gbëaa ˈmö ˈnɩ?

-Li a -lii Lagɔ ˈkää bhäla ˈbhlɩbhë ˈwlu nʋ a ˈtɩtɩ a -tɩtɩɩ, ˈmö Biblë sɛnɩɛ ˈmö. Biblë mɛɛ sɛnɩɛ sɛɛ yɩ -wʋä ˈmö ˈn nɩkpɛ ˈnɩɛ zɩˈɛ -mä ˈbhlɩ a -bhlɩɩ ˈmö glɩ, ˈn sɛɛ Lagɔ ˈkää dʋdʋkpäta ˈbhlɩ a -bhlɩɩ ˈwʋ ˈzʋa a wɛlɩ ˈmö.—-A zɛlɩ ˈKlʋkälɩwɛlɩɩ 21:4, 5 ˈmö.

Lagɔ ˈa wɛlɩɩ käˈɛ gböö, ˈpäpägböö, -ɲɛ ˈdɩmözʋwɛlɩɩ ˈsɔ ˈmö. ˈN sɛɛ Lagɔ -suä nɩkpa, cɛlɩɛ -mä. Mii ˈcɩaɲɩɛ Lagɔ ˈa -wʋwʋsaa. Ɛ bhɛnɩˈɛ ɛ -kaɲɩ kwänɩ -a ˈkä Lagɔ yɩbhlɩnɩ. Sɛɛ -a ˈkää ɔ bheyi zʋ ˈmö ɛ sɛnɩɛ ˈmö.—-A zɛlɩ Psaume 19:7, 11 -ɲɛ Zaakö 2:23 ˈn Zaakö 4:8 ˈsɔ ˈmö.

Sɛɛ Zezwii ˈzʋä ˈn ɔ yiɛ Biblë ˈmö ˈnʋ, blosu nɩ -yiɲɩ kwänɩ -a ˈkɛ ˈmö ˈnʋmö. Biblë a gbɛlɩ ˈmö ɔ zɛlɩ a-a bhʋlʋbhlʋ ˈmö, ˈn ɔ ‘sɛsɛnuë dlɩ -gömö’ wa ˈki ˈmö ˈnʋ.—-A zɛlɩ Lwiikö 24:27, 45 ˈmö.

Lagɔ ˈa ˈtɩtɩ a -tɩtɩɩ a -sɛ a -lii, -yɩ -bhöä ˈmäna ˈwʋ ˈnɩɛ -zu. Yɩ -wʋ -sɩbhä ˈwë, maa -mumuë a gbʋ ˈnɩɛ -mä ˈtɩtɩ a -tɩtɩ ˈla ˈmö -wʋ. Yɩ -bhö -mumuë aˈbhë ˈklɛ ˈwʋ. Maa swɩ nɩ -tɩɲɩ yɔwʋ ˈkunɩ. -A -kä -a ˈkä ˈkwädlɩnɩ -bhölɩɩ, -a kä -a ˈkä Lagɔ yɩbhlɩnɩ.—-A zɛlɩ Zaah 17:3 ˈmö.