A duorisoŋ naŋ la ka, noba na zeŋ la a teŋɛzu kyɛ tegitegilɛ na eɛ yɛlɛ ba naŋ sɛge eŋ a Baabole poɔŋ. (Yieme 37:29) A Baabole taaɛ gama 66. Naaŋmen da soŋɛɛ dɔbɔ naŋ ta ŋa 40 naŋ da e yelmeŋɛ deme baŋ sɛge a Baabole. Moosis la sɛge a Baabole dɛndɛŋ gama anuu na. Aŋa yuomo 3,500 mine naŋ pare la oŋ da sɛgaa. Bitontona Gyɔɔn la sɛge a Baabole gama baaraa soba na. Aŋa yuomo 1,900 naŋ pare wa gaa la oŋ sɛgoo. Nembuo yɛlɛ la ka a Baabole sɛgsɛgreba da sɛge biŋ? Naaŋmen da tu la o vooroŋ soŋ na eŋɛŋ, a vɛŋ ka a Baabole sɛgsɛgreba baŋ yɛlɛ na aŋ seŋ ka ba sɛge biŋ. (2 Saamiuel 23:2) Naaŋmen teɛrɛ la baŋ da sɛge biŋ, ba da ba sɛge ba menne teɛrɛ. Azuŋ, Jehoova la vɛŋ baŋ sɛge a Baabole.​—Kanne 2 Timoti 3:16; 2 Piita 1:20, 21.

 Kaa a vidio, Nembuoŋ Sɛge A Baabole?

 Te baŋɛɛŋ ka a Baabole eɛ gane naŋ yi Naaŋmen zie, bonso o maŋ yelee yɛlɛ naŋ na e nendaare kaŋa ka a yɛlɛ neŋ a zu nyɛ eebo. Nensaalaa zaa kyebe a na baŋ e lɛ. (Joosua 23:14) A Kpeɛ̃o Zaa Daana Naaŋmen yoŋ la na baŋ kaa yɛlɛ a baŋ yɛlɛ naŋ na e nendaare kaŋa.​—Kanne Aizeeya 42:9; 46:10.

 Ka Naaŋmen la vɛŋ baŋ sɛge a Baabole, lɛ yɛŋ a Baabole seŋ ka o e o yoŋ a yi gama zaa poɔŋ. Lɛ ka a Baabole sereŋ waa. Ba maŋ printɛɛ Baabole turiturituri a de tɔre ko noba kɔkɔɛ yaga poɔŋ. Aneazaa ka takoreŋ saŋa la baŋ sɛge a Baabole, kyɛ ka a Baaboleŋ wa yeli science yɛlɛ, a maŋ eɛ yelmeŋɛ a tori meŋ. Ane meŋ, noba 40 na naŋ sɛge a Baabole na ba sɛge yɛlɛ naŋ kyiire taa. a Kyɛ lɛ yoŋ naane, ka hooŋ kaa a Baabole poɔŋ a nyɛ lɛ na oŋ yeli kyaare Naaŋmen nɔmmo na sereŋ wuleeŋ ka a Baabole yi la Naaŋmen zie. A Baabole taaɛ kpeɛ̃o a na baŋ leɛre noba zemmo ka o soma. A yɛlɛ ama zaa  vɛŋɛɛŋ ka noba turituri sagedi ka a Baabole eɛ Naaŋmen Yelbiri.​—Kanne 1 Tɛsalonika 2:13.

 Kaa a vidio, Wala Teŋ Na E Baŋ Ka A Baabole Eɛ Yelmeŋa Gane?

 Yelnimizeɛ naŋ be a Baabole poɔŋ la duorisoŋ naŋ wulo poboɔbo na Naaŋmen naŋ taa ko nensaaleba na. A Baabole wulee bon nanso ka nensaaleba kɔŋ apoɔsori ka ba zeŋ a paradiisi teŋɛ na zuŋ a piilee saŋa na. A Baabole lɛ wulee sori na Naaŋmen naŋ na tu a vɛŋ ka paradiisi leɛ wa bebe.​—Kanne Yel-iriwulaa 21:4, 5.

 Ka hooŋ kaa Naaŋmen Yelbiri na poɔŋ, ho na nyɛɛ bege, sowuli ane kawane o poɔŋ. A Baabole lɛ wuleeŋ lɛ na Naaŋmen neŋ nensaaleba naŋ laŋ e yɛlɛ takoreŋ saŋa. Ka teneeŋ wa kanne a yɛlɛ ama, a maŋ vɛŋeŋ teŋ baŋ Naaŋmen gyogri. Azuŋ, a Baabole na baŋ soŋ boŋ ka ho baŋ Naaŋmen. O wuleeŋ lɛ hoŋ na baŋ e a wa leɛ Naaŋmen zɔmeŋɛ.​—Kanne Yieme 19:7, 11; Gyimisi 2:23; 4:8.

 A gambile ŋa na baŋ soŋ boŋ ka ho woŋ a Baabole muni soŋ. Yezu da maŋ tu la sori kaŋa a wulo noba a Baabole poɔ yɛlɛ. A sori na oŋ da maŋ tu na da maŋ soŋɛɛ a noba baŋ woŋ a Baabole poɔ yɛlɛ muni soŋ. Yezu da maŋ kaa iree Baabole sɛgre kaŋa a wuli ana ‘Sɛgre na poɔ yɛlɛ velaa.’​—Kanne Luka 24:27, 45.

 Yɛlɛ yaga kye a teŋɛ ŋa zuŋ a noma seŋ a duorisoŋ naŋ yi Naaŋmen zie na. Kyɛ, noba mine ba nɔŋ ka ba kyɛllɛ wono a duorisoŋ, ba mine gba suuri maŋ iriŋ ka ba naŋ wa woŋ a duorisoŋ yɛlɛ. Ta wa vɛnɛ ka ho eŋɛ kyoɔrɔ. Teɛretɔ na hoŋ taa ka ho na nyɛɛ nyɔvore naŋ ba taa baaraa na arɛɛ lɛ na hoŋ baŋ Naaŋmen aseŋ.​—Kanne Gyɔɔn 17:3.