Wɔakyerɛw asɛmpa a ɔnye dɛ, nyimpa bɛtsena paradise wɔ asaase do daa no ho asɛm wɔ Bible no mu. (Ndwom 37:29) Nwoma nkakramba 66 na ɔkã bɔ mu yɛ Bible no. Nyankopɔn na ɔmaa nyimpa anokwafo bɛyɛ 40 kyerɛɛw Bible no. Bɛyɛ mfrenhyia 3,500 nye yi a Moses kyerɛɛw nwoma enum a odzi kan no. Bɔbor mfrenhyia 1,900 nye yi a ɔsomafo John kyerɛɛw nwoma a odzi ewiei no. Woana no nsusui na Bible akyerɛwfo no kyerɛwee? Nyankopɔn nam no sunsum krɔnkrɔn no do na ɔnye Bible akyerɛwfo no kasae. (2 Samuel 23:2) Nyankopɔn no nsusui na wɔkyerɛwee na nnyɛ hɔndze bi a. Ntsi Jehovah na ɔyɛ Bible no ne Kyerɛwfo.​—Kenkan 2 Timothy 3:16; 2 Peter 1:20, 21.

Hwɛ video a wɔato dzin Woana Nye Bible No Ne Kyerɛwfo?

Yenyim dɛ Bible no fi Nyankopɔn nkyɛn, osiandɛ ɔkã dza obesi ndaamba ho asɛm pɛpɛɛpɛr. Nyimpa biara nnkotum ayɛ dɛm. (Joshua 23:14) Adze nyina do Tumfo Nyankopɔn nkotsee na obotum edzi kan ehu dza ɔbɔto adasamba ndaamba.​—Kenkan Isaiah 42:9; 46:10.

Yɛhwɛ kwan dɛ nwoma a ofi Nyankopɔn nkyɛn no bɛyɛ soronko, na dɛm pɛpɛɛpɛr na ɔtse. Wɔakyekyɛ Bible no ɔpepepem pii wɔ kasa ɔhaha pii mu. Ɔyɛ nokwar dɛ Bible no yɛ nwoma a ɔakyɛr dze, naaso no mu nsɛm nye abɔdzenyansahu hyia. Bio so, akyerɛwfo 40 no hɔn nsɛm hyia. * Nokwar Nyankopɔn a ɔnoara nye ɔdɔ Nyankopɔn no nkotsee na otum da ɔdɔ a Bible no kã ho asɛm no edzi. Bible no da ho ara wɔ tum a otum sesã nyimpa n’abrabɔ ma ɔyɛ papa. Dɛm nokwasɛm ahorow yi ma nkorɔfo gye to mu dɛ, Bible no yɛ Nyankopɔn n’Asɛm ampa.​—Kenkan 1 Thessalonicafo 2:13.

Hwɛ video a wɔato dzin Yebesi Dɛn Ehu Dɛ Bible No Yɛ Nokwar?

Nsɛntsitsir a Bible no kã ho asɛm no mu kor nye asɛmpa a ɔnye dɛ, Nyankopɔn wɔ botae a ɔdɔ wɔ mu ma adasamba. Kyerɛwnsɛm no kyerɛkyerɛ mbrɛ ɔyɛe a ahyɛse no, nyimpa hweer hokwan a ɔwɔ dɛ ɔbɛtsena paradise wɔ asaase do, nye ewiei koraa no, mbrɛ Nyankopɔn bɛsan dze paradise aba.​—Kenkan Nyikyerɛ 21:4, 5.

Mbra, ngyinadonsɛm na afotu pii wɔ Nyankopɔn n’Asɛm mu. Bio so, wɔakyerɛw nhwɛdo ahorow a ɔma yehu mbrɛ Nyankopɔn nye nkorɔfo dzii ho nsɛm wɔ Bible no mu. Dɛm nhwɛdo ahorow yi ma yehu Nyankopɔn no suban. Ntsi, Bible no botum aboa wo ma eehu Nyankopɔn. Ɔkyerɛkyerɛ mbrɛ ibotum abɛyɛ Nyankopɔn ne nyɛnko.​—Kenkan Ndwom 19:7, 11; James 2:23; 4:8.

Dɛm nwomaba yi nam kwan a Jesus duaa do kyerɛkyerɛe no do bɔboa wo ma aatse Bible no ase. Ɔtwee adwen sii Bible no mu nsɛm do nkorkor nkorkor na ɔkyerɛkyerɛɛ mu ma wɔtsee “kyerɛwnsɛm no ase.”​—Kenkan Luke 24:27, 45.

Biribiara nnyi hɔ a ɔyɛ enyigye kɛse sen asɛmpa a ofi Nyankopɔn nkyɛn no. Naaso, nyimpa binom nnkyerɛ ho enyigye, na binom mpo dze, asɛmpa no yɛ hɔn ehi. Mma w’abaw mu nntu. Enyidado a ewɔ dɛ ibenya onnyiewiei nkwa no gyina Nyankopɔn a ibohu no no do.​—Kenkan John 17:3.