I le Tosi-Tapu, e tou ma’ua ai le logo mālie ko le kakai e lotou ma’uli le’egato loa i le kele. (Pesalemo 37:29) Na fa’ufa’u le Tosi-Tapu ki tosi liliki e 66. Na faka’aoga e le ’Atua le tinofā tagata tui ke tosi ia le Tosi-Tapu. Ko ’uluaki tosi e lima na tosi e Moisese kua ’oki ki ai fētu’u e 3500. Ko le tosi faka’oki na tosi e Soane kua ’oki ki ai fētu’u e 1900. Ko manatu a ai alā na tosi ’ia i le Tosi-Tapu? A le ’Atua kae le’ese le tagata, ko le ’Atua na felogoi mo lātou ki le makeke o le Laumālie Mā’oki’oki. (2 Samuele 23:2) Koia ko Seova e ’au mei ai le Tosi-Tapu. Lau ia 2 Timoteo 3:16; 2 Petelo 1:20, 21.

Kotou tio’i a le ’ata viteo Ko Ai Le Tupu’aga o Le Tosi-Tapu?

E tou iloa ko le Tosi-Tapu e ’au mei le ’Atua talie e fakasā tomu’a mai e ia a ne’a ka soko i le ka ’au, e le’aise toe sala. E le’aise mafai e se tagata. (Sosue 23:14) Ko le ’Atua tokatasi e Tau’aluga e mafai ke aga o fakasā fakatomu’a a le ka ’au o le tagata. Lau ia Isaia 42:9; 46:10.

E mā’oki, ko le tosi e ’au mei le ’Atua e kese. Ko lau i miliale Tosi-Tapu na tufa i māsau e lau i 100. Logo ai ku āfea, kae e ano tasi mo ne’a fakapoto lalasi. Ko le tinofā tagata na tosi ’ia, e le’aise fesagai a lātou manatu. Ko le fakamā’oki aia o le ’alofa o le ’Atua. I le temi nei e mafai ke ina aga o fetogi le ma’uli o le tagata ke mālie. Ko ne’a fuli anā e fakamā’oki ai le lau i miliona kakai ko le Tosi-Tapu ko le Folafola a le ’Atua. Lau ia 1 Tesalonika 2:13.

Kotou tio’i a le ’ata viteo E ’Au Mā’oki Ko Ia Le Tosi-Tapu Mei Le Atua?

Ko le Tosi-Tapu e māsau tafito ki logo mālilie o uiga mo le fakatu’utu’u ’alofa a le ’Atua ki le mālamanei. E fakamatala mai pe na fefe’aki a le puli’i o le palatiso i le kele i le kamata’aga o le isitolia, ti mo fefe’aki le aga a le ’Atua o toe fakatu’u le palatiso. Lau ia Apokalipisi 21:4, 5.

E ma’ua i le tosi lenā a lao, mo pelesepeto mo tokoi. E toe fakamatala ai le isitolia a felogoi a le ’Atua mo le tagata, e fakasā ai lona uiga totonu. Ko le Tosi-Tapu e mafai ke tou iloa ai le ’Atua. E fakamatala ai pe fefe’aki latātou liliu ko le kaune’a o le ’Atua. Lau ia Pesalemo 19:7, 11; Saakopo 2:23; 4:8.

Ko le kaupepa lenei e tokoi atu ke ke mālama ki le Tosi-Tapu o ke muli’i le faifaitaki o Sesu. Na faka’aoga’i e ia le vaega Tosi-Tapu mo fakamatala lona uiga. Lau ia Luka 24:27, 45.

Ko le ne’a fakatupu fiafia ko logo mālilie e ’au mei le ’Atua. Kae e iai a ’iki e le’aise lotou tokaga ti ko ’iki e le’aise lotou fia logo. Ke aua se ke loto ga’ega’e. Kae ko le ako ke ke iloa ai le ’Atua mo ma’ua ai le ma’uli le’egato. Lau ia Soane 17:3.