Yemboe 3
¿Añetetera Tumpa omee kuae ñee ikavi vae?
1. ¿Kia iyemongetapa oï Bibliape?
Bibliape oime ñee ikavi vae yaiko avei vaerä ɨvɨpe (Salmo 37:29). Bibliape ñogüɨnoi 66 kuatía raɨ reta. Tumpa oiparavo 40 kuimbae jupi vae oikuatía vaerä. Oasama 3.500 año Moisés oikuatiagüe jókuae 5 tembikuatía tenondegua vae. Jare oasama 1.900 año temimondo Juan oikuatía tembikuatía taɨkuegua vae. ¿Kia iyemongetapa oikuatía jókuae kuimbae reta? Tumpa oikuaauka chupe reta iyemongeta iespíritu santo rupi (2 Samuel 23:2). Jaeramo, jae reta oikuatía Bibliape Tumpa iyemongeta reta. Emongeta 2 Timoteo 3:16 jare 2 Pedro 1:20, 21.
Emae video ¿Kia iñeepa oyekuatía Bibliape?
2. ¿Maerapa yandepuere yarovia añeteko Biblia jei vae?
Opaete Biblia jei vae oasa, jaeramo yaikuaa ou Tumpagüi. Echa, Tumpañoko ipuere oikuaa mbaembae oasata vae, kuimbae ipuereäko (Josué 23:14). Tumpa Imbaepuere yae vaeñoko ipuere oikuaauka yanderenonderä. Emongeta Isaías 42:9 jare 46:10.
Biblia mbaetɨko oyovake, ou Tumpagüi ramo. Biblia oñemoai jeta ñee retape opaete ɨvɨ rupi. Añave kuimbae iyarakuaa vae reta jetama oyemboe jare oikuaa mbaembae ɨvɨre, ërei Bibliape arakaetemako oyekuatía kuaere. Yepetëi 40 kuimbae reta oikuatía vae mbaetɨ etei oyoavɨ oikuatiagüepe. * Oyekuatía vae oechauka kërai yae Tumpa yanderaɨu, jare ipuere omborɨ opaete oipoepɨ vaerä jekove ikavi peguarä. Jaeramo, jeta yae güɨrovia Biblia añeteteko Tumpa Iñee. Emongeta 1 Tesalonicenses 2:13.
Emae video ¿Maerapa yandepuere yarovia Biblia añetete jei vae?
3. ¿Mbae reguapa imiari Biblia?
Biblia oechauka mbae ikavigüe vae Tumpa oyapota tëtara reta peguarä. Omombeu maerapa oñemombo yandeɨpɨ reta paraísogüi jare kërai oyeapoyeta ɨvɨ paraíso opɨta vaerä tenonde rami. Emongeta Apocalipsis 21:4, 5.
Tumpa Iñeepe oime mborookuai jare yemboarakuaa reta yandemborɨ yaiko vaerä yerovia reve. Omombeuvi kërai Tumpa oyangareko tëtara retare, kuae oechauka këraiko Jae. Jaeramo, Biblia yandemborɨ yaikuaa vaerä Tumpa. Jeivi mbaepa yayapota yayemboya vaerä Tumpare yandevɨa-ïru rami. Emongeta Salmo 19:7, 11; Santiago 2:23 jare 4:8.
4. ¿Mbaepa ndemborɨta jësaka vaerä ndeve Biblia?
Kuae kuatiarɨru ndemborɨta jësaka vaerä ndeve Biblia. Jesús imaenduase metei versículore jare omoësaka mbae oipota jei. Jökoraivi kuae kuatiarɨrupe oñeñono texto bíblico reta jare oñemoësaka, yaikuaa kavi vaerä Biblia oporomboe vae. Emongeta Lucas 24:27, 45.
Reyerovia yaetako jësaka ndeve yave ñee ikavi vae oime Bibliape. Ërei amogüe mbaetɨ oipota oikuaa jesegua jare oime kia iyarasɨ kuaere. Jaeramo, agüɨye kuae ndemboateɨ. Biblia etei jei reiko aveita reikuaa katu Tumpare yave. Emongeta Juan 17:3.
^ párr. 3 Eecha ñeerɨru La Biblia... ¿la Palabra de Dios, o palabra del hombre?
