ʼƗKITƗARIKA 3
¿Bibliatsíe niuki ʼaixɨ ʼaneneetɨ mayehú, yurímekɨ Yuútsi tiniukieya?
1. ¿Keane pɨniukíeya Bibliatsíe mɨrayaʼuxa?
Yuútsi Niukieyatsíe xeime niuki ‘aixɨ ʼaneeme paxaxaata, paine kenaame tuukaari kaxɨɨweme tehexeiyatɨ teʼakɨɨné ʼeena Kwieépa (Salmo 37:29). Yuútsi pɨwaranuyawau 40 ʼuukitsi ʼikɨ xapa memɨtaʼutɨanikekaikɨ, pexeiya 66 xapate. Matɨari ʼauxuwitɨ mayehú Moisés piitiʼutɨa metá 3,500 wiitaari rí panuyemié, kwinaatɨrieka tá Juan mitaʼutɨa panuyemie rí 1,900 wiitaari. Tita mɨrayemié Bibliatsíe Yuútsi mɨpaɨ pɨtiyukɨhɨawe, yutɨrɨkariyakɨ yapɨtiwaruʼeritɨa teʼutɨwamete kehepaɨ Niukíeya memɨteʼutɨanikekai (2 Samuel 23:2). Kememɨtekuʼeeriwakai mɨpaɨ mekwateʼuʼutɨa matsi pɨɨtá Yuútsi kemɨtiyukɨhɨawe hepaɨ mepɨteʼuʼutɨa. ʼAyumieme Biblia Jehová pɨxapaya. Nakaterɨwa 2 Timoteo 3:16 * metá 2 Pedro 1:20, 21. *
2. ¿Títakɨ yuri teteʼerieka kenaame Bibliatsíe mɨrayemié yuri tihɨɨkɨ?
Yuútsi mitaʼutɨakɨ yutɨrɨkariyakɨ, ʼayumieme mɨkɨtsíe yuri tepɨteʼerie. Maana yatarahɨawe ʼuxaʼa waarié kemɨtiyɨní xewitɨ tewi mɨpaɨ kwarakumaate (Josué 23:14). Xeikɨ́a Yuútsi naime mɨtikema yapɨtiyuriewe. Nakaterɨwa Isaías 42:9 * metá 46:10. *
Yuútsi Niukíeya mɨhɨɨkɨkɨ hiipame xapate hepaɨ kwaʼaane. Meyuwaɨkawatɨ Yuútsi Niukíeya mepexeiya yuniukikɨ ʼayaʼutɨariekame. Biblia metá ciencia yaxeikɨ́a pɨtikunanakitsitɨwa, tseepá xɨka kwinié reuteewini Biblia mutaʼutɨarietsíe. 40 teʼutɨwamete xeimetsíe mieme xeikɨ́a mepɨteʼutaʼutɨa. * Maana pɨrayemié Yuútsi kemɨtiuyukanakeʼerie metá hiikɨ teuteri watuukaari puuwaapawe ʼaixɨ memɨtehaukuteenikɨ. ʼAyumieme meyuwaɨkawatɨ teuteri yuri mepɨteʼerie kenaame Biblia Yuútsi Niukíeya hɨɨkɨ. Nakaterɨwa 1 Tesalonicenses 2:13. *
3. ¿Biblia titatsíe tikuxaata?
Bibliatsíe yeme ʼaixɨ tiʼanetɨ pɨraxaxaatsiwa. Maana paine ketiʼaneneeme Yuútsi mɨreuyehɨwá teuteri waheetsíe. Tsiere payetaine matɨari Yuútsi teuteri pɨwarutiwewi metá mɨkɨ ʼaixɨ mekwatekakɨ́, haaraweri mepeuyehɨa heyeme meʼuʼuwaatɨ mekwaʼakɨ́ metá paine tawaarié haaraweri payeitɨani. Nakaterɨwa Revelación (Apocalipsis) 21:4, 5. *
Yuútsi Niukieyatsíe payemié nɨʼarikate, ʼɨkitɨarika metá mariʼitsitɨarika. Maana tsiere yatarahɨawe teuteri kemɨwaratiyuriexime, mɨpaɨ tepɨteheitimaamateke kemɨtiukaʼiyaari. ʼAyumieme Biblia tatsipareewie temeitimaamatenikɨ. Tsiere tatikuʼɨɨkitɨwa tita mɨreuyewetsé Yuútsi hamikumaama temakɨɨnekɨ. Nakaterɨwa Salmo 19:7, * 11; * Santiago 2:23, * metá 4:8. *
4. ¿Títa tatiupareewiwe Biblia temetiʼenietɨkɨnekɨ?
Keane mɨtiwaʼɨɨkitɨakai ʼaixɨ memɨteheitiʼenietɨkɨnekekaikɨ, Yuútsi Niukieyatsíe ʼenayewawatɨ Ketsuútsi pɨtiwaʼɨɨkitɨakai. ʼIkɨ xapa yaxeikɨ́a tsiere pɨtatikuʼɨɨkitɨwa yeme ʼaixɨ temɨteheitiʼenietɨkɨkanikɨ ʼɨkitɨarikate Yuútsi Niukieyatsíe mieme. Nakaterɨwa Lucas 24:27, * 45. *
Yuútsi niukite ʼaixɨ ʼanɨyɨtɨkaime mexeiyakɨ tepɨtehaʼeeriwa, xɨari yeme matsi waɨká pereumaimɨtɨ pepayaaní. Hiipatɨ teuteri mɨkɨ kwawakunanaake, hiipatɨ tá mepakahaʼatɨkɨka xɨka mɨkɨtsíe timieme petiwarutaxaatɨani. Tseepá teuteri kememutiyuane peukatikuhayeikawani. Bibliatsíe paine, keane Yuutsitsíe memɨtehetimaamateke heyeme meʼuʼuwatɨ mepakɨɨné. Nakaterɨwa Juan 17:3. *
^ párr. 1 2 Tim 3:16: Naitɨ ʼutɨarika xapatsíe Yuútsi ʼineetɨaku yapɨreʼuxa, mɨtatikuʼɨɨkitɨwanikɨ, yamɨtatikɨhɨawenikɨ tita haxa mɨtiʼaane, tatikuʼɨɨkitɨwatɨ tita ʼaixɨ mɨtiʼaane, tita mɨtiheitserie mɨtatiʼɨɨkitɨakakɨ,
^ párr. 1 2 Pe 1:20, 21: Xeme ʼikɨ meri xemɨteʼamaatekɨ, tita mɨrayaʼutɨarie, xewitɨ tewi kemɨtiɨyɨhɨawixɨ heetsíe kwaʼayemieme. Mɨtiutaʼutɨariekɨ mɨkɨ xewitɨ ʼukí ʼutɨarika kaʼuʼatɨa, matsi pɨɨtá Yuútsi heetsíe mepɨteʼutaxaataxɨ tɨrɨkariyaya waruwitɨximekaku.
^ párr. 2 Isa 42:9: Neuxéi, matɨari mɨtimieme katinanakayaani rí. Hiikɨ tá tihehekwame nepɨxeraxaxaatɨwa. Katiyukatsutɨawekaku mɨtiyuhekɨaretsíe yenepɨxerahɨawe.
^ párr. 2 Isa 46:10: Ne matɨari paitɨ yaneputaine kwinatɨrieka kemɨtiyɨní, metá waɨkawa panuyayaʼá keaneta mɨkarayuyaʼatɨawe. Ne kenemaine yapɨtiyɨní metá tita mɨnetinaake yenepɨtiyurieni.
^ párr. 3 Xapa neuxeiya La Biblia... ¿la Palabra de Dios, o palabra del hombre?
^ párr. 3 1 Tes 2:13: Yémekɨ, ʼayumieme taame tsiere tepɨkatekuhayeikawa Yuútsi pamɨpariutsi tetekɨhɨawetɨ, kepauka Yuútsi niukíeya xemanunakixɨtsíe, xetatsiʼuʼenieka, xepitanakeʼeri, ʼukí niukíeya hepaɨ xekwateʼixéi, matsi pɨɨtá yeme Yuútsi niukíeya hepaɨ, yuri heetsiena xemɨteʼerie puxetsiyepareewixime.
^ párr. 4 Rev 21:4,5: Metá naime waʼuukai kanaʼitiexɨamɨkɨ wahɨxita. Tawaarié mepɨkakwiní, mepɨkateʼukakukwiineni. Tita meripaitɨ mɨtimiemétɨkai katinanakayaani rí». Metá Mɨkɨ ʼuwenitsíe makakatei kaniutayɨní: «¡Neuxéi!, naime piinite tihehekwame nepɨtitiwewieni». Tsiere kanaineni: «Tinakaʼutɨa, mɨyɨwekɨ ʼikɨ niukitsíe yuri mɨtiʼerieka metá pɨtiyuri».
^ párr. 5 Sal 19:7: Jehová nɨʼarikaya yeme payaʼaxé, tuukaari ʼaixɨ ʼaneeme kanayeitɨwani.
Jehová ʼɨkitɨarikaya yuri pɨhɨɨkɨ, keane mɨkareutamaiwé timaiweme payeitɨwa.
^ párr. 5 Sal 19:11: Mɨʼatsiʼayexeiya pɨkuʼɨxatsitɨwa;
xɨka ʼikuʼeniwani ʼimikieri ʼaixɨ ʼaneme hexeiyatɨ kanayeimɨkɨ.
^ párr. 5 St 2:23: metá ʼutɨarika kanayuyaʼatɨani mayataine: «Abrahán yuri pɨtiutaʼeri Jehová heetsíe, metá puʼinɨatsie xewitɨ heitseriemekɨ muyeika hepaɨ», metá «Jehová hamikuya» titewatɨ kanayaní.
^ párr. 5 Sant 4:8: Hurawa xekeneyakɨni Yuútsi hetsɨa metá mɨkɨ xehetsɨa hurawa pɨyeyaní. Xeneuyuʼitiexɨaka yumamatetsíe, xemɨʼixɨrikimatɨká, yuʼiyaari xeneutaʼiti, xeme xeʼiyaari manutahuhuta.
^ párr. 6 Luc 24:27: Katiniukatsutɨani Moisés metá Profetatsixi waʼutɨarikatekɨ metá pɨtiwarutaʼɨɨkitɨa naitɨ ʼutɨarikate kemayataitɨkatei heetsiena mieme.
^ párr. 6 Luc 24:45: ʼAnamɨyá niwarupareewieni naime ʼaixɨ memɨtehetiʼenietɨkɨnekekaikɨ kehepaɨtɨtɨ manɨyɨne ʼutɨarika Yuútsi niukieyatsíe mieme,
^ párr. 7 Jn 17:3: ʼIkɨ kananuyɨneni tuukaari mɨkaxɨɨwe, memɨʼatsiʼakumaiká, pemɨyuxewí yuri Yuútsi, metá keane pemeyanɨʼa, Ketsukɨritsitu.
