Ombuze ombwa yokutja ovandu mave kahupa kombanda yehi nga aruhe ya tjangwa mOmbeibela. (Epsalme 37:29) Ombeibela ya zikama moumbo ouṱiṱi 66. Mukuru wa ungurisa ovarumendu ovaṱakame ape 40 okutjanga oumbo mbwi. Omambo omatenga yetano ya tjangwa i Moses ozombura ape 3 500 nḓa kapita. Embo esenina ra tjangwa i omuapostele Johanes ozombura ape 1 900 nḓa kapita. Ovatjange vOmbeibela va tjanga omeripura wauṋe? Mukuru wa ungurisa ombepo ondjapuke okuveraera imbi mbi mave sokutjanga mOmbeibela. (2 Samuel 23:2) Owo va tjanga omeripura waMukuru nu kameripura wawo oveni. Okutja Jehova ongu ri Omutjange wOmbeibela.​—Lesa 2 Timoteus 3:16; 2 Petrus 1:20, 21.

Tarera OKavidio Ouṋe ngwa tjanga Ombeibela?

Eṱe matu tjiwa kutja Ombeibela ya za ku Mukuru orondu oyo i kwizika oviṋa mondja mbi mavi katjitwa moruyaveze. Kape nomundu warwe ngu yenena okukwizika oruyaveze momuano mbwi. (Josua 23:14) Mukuru Omunamasaaehe erike ongu yenena okutjiwa oruyaveze rwovandu.​—Lesa Jesaja 42:9; 46:10.

Eṱe matu undjire ko kutja embo nda za ku Mukuru ri rire embo rapeke, nu tjiri oro embo rapeke. Omatau omengi wozOmbeibela ya yandjwa momaraka omasere omengi. Nu nandarire kutja Ombeibela embo ekuru, oyo i hitasana nounongo wovimemwa mbu nouatjiri. Nu wina ovatjange mba 40 kave tjangere oviṋa mbi vetasana oviuru. * Komurungu wanao, Ombeibela nokuhina omakeyakeyero i raisa orusuvero rwaMukuru noyo ngamba i nomasa wokurundurura omiinyo  vyovandu. Oviṋa avihe mbi vi raisira ovandu omangete omengi kutja Ombeibela Embo raMukuru.​—Lesa 1 Ovatesalonika 2:13.

Tarera OKavidio Matu tjiwa vi kutja Ombeibela i nouatjiri?

Ombeibela i twara ombango kombuze ombwa yokutja Mukuru u nondando ombwa kovandu. Omatjangwa ye raisa kutja ovandu va pandjara vi ondjingonekero ndji va ri na yo okuza kotjimemenwa, yokuhupa moparadisa kombanda yehi, nokutja oparadisa mai kotorwa vi.​—Lesa Omavandururiro 21:4, 5.

MEmbo raMukuru wina mu nomatwako nomirari nomaronga. Mu ro wina mu nomahungi ohunga nomuano Mukuru mbwaa tjindi ovandu, omakuruhungi nge tjiukisa ovikaṋena vyaMukuru. Okutja Ombeibela mai ku vatere okutjiwa Mukuru. Oyo i kahurura kutja mo yenene vi okurira epanga raMukuru.​—Lesa Epsalme 19:7, 11; Jakobus 2:23; 4:8.

Okambo nga make ku vatere okuzuva Ombeibela nawa mokuungurisa omuano Jesus mbwaa ungurisa. Eye wa ungurisa omatjangwa yOmbeibela nu aa kahururire ovandu “kutja ve tjiwe Omatjangwa.”​—Lesa Lukas 24:27, 45.

Kape notjiṋa tjarwe tji tji yorokisa ovandu tjimuna ombuze ombwa okuza ku Mukuru. Posi yokutja ovandu tjiva kave yandja ko ombango nu varwe tji ve pindikisa. Otjiṋa tji atji ku teya ombango orondu kutja u kamune omuinyo waaruhe, ove mo sokutjiwa Mukuru.​—Lesa Johanes 17:3.