DISÁ 3
O Kuila o Njimbu Iambote ia Tokala Kua Nzambi?
1. O Bibidia ia Tokala kua Nanhi?
O njimbu iambote ia lungu ni athu, a-nda kala ku muenhu ua kalela-ku, io soneke mu Bibidia. (Jisálamu 37:29) Mu Bibidia tu sanga-mu 66 a madivulu. Nzambi ua tumina 40 athu ku soneka o Bibidia. Mozé ua soneka o madivulu atanu, kua bhiti kiá 3.500 tundé kia a soneka. O poxolo Nzuá ua soneka o divulu dia sukina mu Bibidia, kua bhiti kiá 1.900 a mivu tundé kia di soneka. Izuelu ia nanhi ia soneka mu Bibidia? Nzambi ua a zuela ni asoneki a Bibidia bhu kaxi ka nzumbi iê ikôla. (2 Samuuele 23:2) Ene a soneka o ibanzelu ia Nzambi, kana o ibanzelu iâ. Kienhiki, o Bibidia ia tokala kua Jihova.—Tanga 2 Timote 3:16; 2 Phetele 1:20, 21.
Tala o vidyu O Bibidya ya Tokala Kwa Nanyi?
2. Kiebhi ki tu tena kuijiia kuila o Bibidia i longa o kidi?
Etu tuejiia kuila o Bibidia divulu dia Nzambi, mukonda diene di tanga ni kidi kioso o ima ia-nda bhita ku hádia. Se-ku muthu u tena ku bhanga kiki. (Josuué 23:14) O Muteni-a-Ioso muene ngó u tena ku tanga ihi ia-nda bhita ni athu ku hádia.—Tanga Izaia 42:9; 46:10.
Ki tueji kingila kuila o divulu dia Nzambi di sokela ni madivulu a mukuá. Mazunda a ji Bibidia ene mu ji bhanga mu mazui avulu. Sumbala iokulu kiá, o Bibidia izuela o kidi kiene mu zuela o jingijiie. Sumbala 40 athu a soneka o Bibidia, maji ene a zuela kima kimoxi ngó. * O Bibidia ilondekesa ué o henda ia Nzambi, iene iala ni kutena kua ku lungulula o mienhu ia athu phala ku kala ni ukexilu uambote. O kidi ki bhangesa jimidi ja athu ku xikina kuila o Bibidia, Mak’â Nzambi.—Tanga 1 Tesalonika 2:13.
Tala o vidyu Kyebhi ki tu Tena Kwijiya Kwila, o Bibidya Divulu Dya Kidi?
3. Ihi i longa o Bibidia?
O Bibidia i longa kuila o njimbu iambote, ilondekesa o henda ia Nzambi ku athu. O Mikanda ikola, izuela kiebhi o athu a dianga mu ixi, a texi o ujitu ua ku kala mu palaízu, ni kiebhi Nzambi kia-nda iudika dingi o palaízu.—Tanga Dijingunuinu 21:4, 5.
Mu Mak’â Nzambi tu sanga-mu ué itumu, ijila, ni itendelesu. Ki tu sange ngó misoso ia lungu ni kiebhi Nzambi kia dibhana ni athu m’ukulu—misoso ilondekesa o kídifua kia Nzambi. Mu kiki, o Bibidia i tena ku ku kuatekesa kuijiia Nzambi. I jimbulula kiebhi eie ki u tena ku kala kamba diê.—Tanga Jisálamu 19:7, 11; Tiiaku 2:23; 4:8.
4. Kiebhi ki u tena ku tendela o Bibidia?
O kadivulu kaka, ka-nda ku kuatekesa ku tendela o Bibidia, mu ku kala ni uhete ua kexile nau Jezú. Jezú ua kexile mu tumbula o ibatulu ia Bibidia, ni ku “kutetulukila o kuívua kiambote o Madivulu a Ngana.”—Tanga Luka 24:27, 45.
Ima iofele i tena ku sangulukisa o muthu kála o njimbu iambote ia Nzambi. Né kiki, saí athu ka i xikina, a mukuá a kala ni njinda iavulu. Kana ku luuala. O kidielelu kiê kia ku tambula o muenhu ua kalakela-ku, kijila ngó mu kuijiia Nzambi.—Tanga Nzuá 17:3.
^ kax. 3 Tanga o kadivulu, Um Livro Para Todas as Pessoas, mu phutu.
