XORꞸ 3
Na joo kʼo mama ne Biblia, ¿mejme nge e Mizhokjimi kʼꞹ o mamakʼo?
1. ¿Kjo nge kʼꞹ go mama pje ro jñusʼiji kja ne Biblia?
Kja ne Biblia mama ke yo ntee kʼo kjaji kʼo mama Mizhokjimi ra minji texe yo paa kja ne Xoñijomꞹ (Salmo 37:29). Ne Biblia pɇsʼi 66 tsʼilibro. E Mizhokjimi o juajnꞹ 40 bʼɇzo ro opjꞹji ne Biblia. Kʼꞹ go mbꞹrꞹ ne Biblia ngeje e Moisés, a ni paa 3,500 tsjɇɇ ma gua dyopjꞹ kʼo tsichʼa tsʼilibro kʼo ba e̱je̱ nuja mbꞹrꞹ ne Biblia. O kjogꞹ 1,600 tsjɇɇ ma kʼe apostol Juan go jñusʼꞹ kʼe libro Apocalipsis, kʼꞹ ba e̱je̱ nuja ni nguarꞹ kʼe Biblia. O espiritu Mizhokjimi Jehová o mbøsʼꞹ kʼo bʼɇzo ngekʼua go jñusʼꞹji na joo (2 Samuel 23:2). Kʼo bʼɇzo dya go jñusʼꞹji kʼo mi nee angezeji o jñusʼꞹji jama nee e Jehová ngekʼua yo jñaa kʼꞹ go opjꞹjinu nge o tsjaja e Jehová. Xorꞹge kja 2 Timoteo 3:16; 2 Pedro 1:20, 21.
Jñanrra ne video ¿Quién es el autor de la Biblia?
2. ¿Mejme kʼo mama ne Biblia?
Kʼo mama kja ne Biblia ngeje e Jehová kʼo mamakʼo ngekʼua ga kjogꞹ kʼua janzi ba mamanu (Josué 23:14). Dya bʼꞹbʼꞹ na bʼɇzo kʼꞹ ra mama pje ra kjogꞹ ra xo̱rꞹ, ngextrjo e Jehová soo ra xitsigoji pje ra kjogꞹ a ma axojñi. Xorꞹge kja Isaías 42:9; 46:10.
E Biblia nge o tsjaja e Mizhokjimi. Ne Biblia go dyopjꞹji kja na punkjꞹ jñaa kʼꞹ ñaji yo ntee, ngekʼua na punkjꞹ pɇsʼiji dʼa Biblia. Ne Biblia dya go tsjaji para ra xopꞹji yo trʼii kja ngunxorꞹ, pero ma ga mama jaga kjaa kʼo bʼꞹbʼꞹ kja ne Xoñijomꞹ mama kʼo na kjuana. Zo mi kuarenta bʼɇzo kʼꞹ go dyopjꞹji ne Biblia, dya mi bʼꞹbʼꞹ dʼa bʼɇzo kʼꞹ ro mama dya ma kjuana kʼo mi mamaji kʼo nrre bʼɇzo. * Ma ri xorꞹji ne Biblia ri unꞹji nguenrra ke e Mizhokjimi me sʼiyazgoji. Ngekʼua kja ne Biblia xitsʼkoji ra kjaji kʼo na joo ngekʼua ra mimiji na joo. Na punkjꞹ ntee unꞹji nguenrra ke me na joo ga mimiji ma ga kjaji kʼo mama kja ne Biblia. Ga kjanu xo unꞹji nguenrra ke ne Biblia ngeje o Jñaa e Mizhokjimi. Xorꞹge kja 1 Tesalonicenses 2:13.
Jñanrra ne video ¿Por qué podemos confiar en que la Biblia dice la verdad?
3. ¿Pje ri pa̱rge ma ri xorge ne Biblia?
Kja ne Biblia mama e Adán ñe kʼe Eva o mimibi na joo, pero dya go mborꞹbi kʼo mi pɇsʼibi o pekabi. Janzitrjo paa kʼꞹ go mimibi kja kʼe xoñijomꞹ kʼꞹ me ma zøø, kjanu go pjongꞹbi dya kja xi go mimibinu. Ne Biblia xitsigoji kʼo me na joo, mama e Mizhokjimi me sʼiyazgoji ngekʼua nrro ra tsjaa ne Xoñijomꞹ me rrꞹ zøø ngekʼua ra minji na joo. Xorꞹge kja Apocalipsis 21:4, 5.
Kja ne Biblia ri chøtrʼꞹge o ley Mizhokjimi. Ko ne Biblia e Mizhokjimi jitsʼkoji jarga minji na joo. Nu kʼo go tsjaa mi jingua ma mi zopjꞹ yo ntee, nujyo mbøxkꞹgoji ra mba̱ra̱ji jaga kjaa Mizhokjimi. Ri xorꞹge ne Biblia, ri tsjage kʼo na joo akjanu ri jobi e Mizhokjimi. Xorꞹge kja Salmo 19:7, 11; Santiago 2:23; 4:8.
4. ¿Pje ri tsjage ngekʼua ri pjechi kʼo mama ne Biblia?
Ma ri xorge ne skuama ri pjechi kʼo mama ne Biblia. E Jesús mi pjechi pje mama ne Biblia, mi xipji yo ntee na jñaa kʼo mi mama ne Biblia kjanu mi jichi pje mi nee ro mama kʼe jñaakʼꞹ. Xorꞹge kja Lucas 24:27, 45.
Me na joo kʼo ri pjechigeba. Dya bʼꞹbʼꞹ na libro nzakja ne Biblia. Bʼꞹbʼꞹ ntee kʼꞹ dya nee ra dyⱥrⱥji kʼo mama ne Biblia, pe nutsʼkʼe dya ri tsjage nzakja angezeji. Ma gi nee ke e Jehová ra mbøxkʼꞹge ngekʼua ri minkʼe nrrexe yo paa kja ne Xoñijomꞹ kʼꞹ me rrꞹ zøø sido ri pjechige kʼo mama ne Biblia. Xorꞹge kja Juan 17:3.
^ par. 3 Ri xorꞹ kʼe skuama ¿Pje mama ne Biblia?
