TUNDL 3
Laabamann nba be Biibl n ninŋ nyiɛ Yendu buol i yen mɔni ii?
1. Biibl nyiɛ ŋmaa buol i?
Laabamann nba tie g niib tan bu la miɛl nba g mɔg gbennu be Biibl n ninŋ i. (Matieog 5:5) Biibl n ninŋ, kadabid piinluob yen ŋanluob (66) n be. Yendu n bo lugd yab k b diɛn Biibl bo tie nyan niib piinna (40) nne i. Moyis n bo diɛn Biibl kadaad ŋanmu nba cind. Wan diɛn l kadaad, l saa bina tuda ŋantaa yen kobiinmu (3 500) n nyan. Apostolo San n bo diɛn kadaaɔg nba juod. Wan diɛn l kadaaɔg, l cie bina tudl yen kobiinwai (1 900.) Biibl kadadiɛna bo diɛn ŋmaa yaa maalm i? Yendu bo tug u foŋanm i g tod yab diɛn Biibl k b fid g bann u maalm. Biibl kadadiɛna bo g diɛn banm mɔno yaa maalm kaa, Yendu maalm i k b bo diɛn. Lann n ŋɔnŋ g Biibl nyiɛ Yendu buol.—Lii 2 Timote 3:16; 2 Piɛr 1:20, 21.
2. Bɛ n ŋɔnŋ g Biibl nyiɛ Yendu buol yen mɔni i?
T ban g Biibl nyiɛ Yendu buol i yen mɔni g dugn Biibl tu ŋɔn yal bu baal wonn po g sua k l daa g baal. Nil g be g bu fid g ŋɔn yal bu baal wonn po. (Sosuwe 23:14) Yendu paciɛnudaan kukua n bu fid g ŋɔn yal bu baal ŋanduna n ninŋ wonn po lan tien jaa jaa jaa.—Lii Tiit 1:2, 3.
Kadaaɔg nba nyiɛ Yendu buol kan fid gii taa yen kadaliel-nba. L po n te g Biibl g taa yen Kadaliel-nba. B nyan Biiba k l pund tudbanm g be mabuoli bonciɛnn n ninŋ. Biibl g tie kalaatu ŋaag kadaaɔg kaa, b biɛ diɛn l kadaaɔg k l wai ama youg nba k l maad bontitagd maam, lan maad yal tu tie mɔni i. Biibl kadadiɛna piinna (40) ŋann n ninŋ, sua g maad siɛl k l g taa yen lieb yal. * Biibl n maad yal buam po ŋɔnŋ k l kadaaɔg nyiɛ Yendu nba mɔg buam buol i. Biibl biɛ mɔg paalu nba bu lebd niib binbem ban ji gii mɔg binbem nba ŋan. L kul ne n tod niib bonciɛnn k b tuo g Biibl nyiɛ Yendu buol.—Lii 1 Tɛsaloniik Kristo-yab 2:13.
3. Biibl maad bɛ yaa maam i?
Biibl n ŋanm g maad laabamann nba maam tie g Yendu bua wan te niib binbem nba ŋan wonn po i. Biibl ŋɔn yal po te k Adam yen Ɛf bo buon paradi hal cilg youg yen nand nba g Yendu bu tien tinŋ n guan g kpand paradi.—Lii Dɔgdu 21:4, 5.
Biibl n ninŋ, t biɛ bu fid g la yiko-nba, tunda yen cegli. Biibl biɛ ŋɔnŋ siɛnyoug Yendu n bo be yen niib nand nba, nnyan t bu fid g bann wan tie daan nba. Biibl bu fid g tod’ti tin bann Yendu g biɛ ŋɔn’ti tin bu tien nand g fid g suol dɔnnu yen’o.—Lii Rom Kristo-yab 15:4; Saak 2:23; 4:8.
4. A bu tien nle i g fid g gbad Biibl tunda niimn ni?
Kadaaɔg ne bu tod’a ŋan gbad Biibl tunda niimn. L kadaaɔg ŋɔnŋ bona nyan Yiesu mɔ n bo tu tie nand g tund niib nyan i. U bo tugd Biibl lanma i yenn yenn g ŋɔnŋ l “niimn”.—Lii Luk 24:27, 45.
Siɛl g be g bu fid g manŋ nil pal g cie laabamann nba nyiɛ Yendu buol. G nyaan siɛb be g g bua ban cenŋ l laabaal, lieb mɔ be k l laabaal benŋ b pala. Ama daa ŋaa a pal ń wad. A gii kpaan ŋan bann Yendu, lann n bu fid g te ŋan la miɛl nba g mɔg gbennu.—Lii San 17:3.
^ lɔnŋ. 3 Diid kadaaɔg ne: Un livre pour tous.
