ISAMBILILO 3
Uzye I Cumicumi A Leza Aakatuneena Ilyasi Lisuma?
1. Uzye amazwi aaya muli Baibolo akwe weni?
Muli Baibolo alimo mwaya ilyasi lisuma ilya kuti antu yalikala pano nsi manda pe. (Masamu 37:29) Baibolo yapangwa na mabuuku anono 66. Leza waomvizye antu acumi 40 kulemba mabuuku yayo. Uwalemvile mabuuku yakutandikilako 5, a Mose. Papita ni myaka 3,500 kufuma pano wayalembiile. Lyene imyaka 1,900 kucisila kuu, alino Yoane nawe walemvile ibuuku lya kulekelezya. Uzye antu yaya alemvile Baibolo, yalemvile amazwi yakwe weni? Leza waomvizye umupasi wakwe uwa muzilo kuneena antu ivya kulemba muli Baibolo. (2 Samueli 23:2) Kuli kuti yalemvile ivyeo vyakwe Leza, asi vyeo vyao foo. Fwandi tungati amazwi aaya muli Baibolo akwe Yeova.—Welengini 2 Timoti 3:16; 2 Petulo 1:20, 21.
Tambini vidyo ya kuti Uzye Amazwi Aaya Muli Baibo Akwe Weni?
2. Tungasininkizya uli ukuti vino Baibolo yalanda i vya cumi?
Twamanya ukuti Baibolo yafuma kuli Leza pano yalondolola ningo sana ivintu ivilacitika uku nkoleelo. Kutaaya umuntu nanti umwi aangasoowela ivintu wako vii. (Yoswa 23:14) Leza Uwa Maka Yonsi aaliwe sile angamanya ivilacitikila antu ku nkoleelo kwaula ni mpuso.—Welengini Ezaya 42:9; 46:10.
Ibuku li lino Leza walemba lyapusana sana na mabuku yauze. Kwaya imintapendwa ni mintapendwa ya maBaibolo aalembwa nu kusalangana umu ndimi ziingi sana. Ukuya kwene, Baibolo yalemvilwe mpiti sana, nomba vino ikalandapo, na yasayansi ampomvu yakavilanda. Kapya, vyonsi vino ya kalemba yaya 40 yalemvile, vyali pi lyasi lili-limwi kwene kwaula ukupusana. * Alino, Ndi twalola vino Baibolo ikasambizya pa citemwiko, tungati a Leza sile aaliwe angalondolola vivyo, pano wene a Leza wa lukundo. Nakupya, Baibolo yakwata amaka akusenula antu pa kuti yaikala ningo. Visinka vyonsi vii vikalenga ukuti antu aingi sana yazumile ukuti Baibolo Izwi lyakwe Leza.—Welengini 1 Tesalonika 2:13.
Tambini vidyo ya kuti Tungasininkizya Uli Ukuti Vino Baibo Ikalanda I Vya Cumi?
3. Ivyani ivyaya muli Baibolo?
Baibolo ikalanda sana pi lyasi lisuma ilya kuti Leza akalonda kuti antu yace yaikala ningo. Malembelo yakalondolola ningo vino antu ankoleelo yalekeliizye isyuko lya kwikala umu paladaise, alino na vino insi yonsi ilaya paladaise nupya.—Welengini Umbwilo 21:4, 5.
Izwi lyakwe Leza lyakwata na masunde, napya likapandako na mano. Na cuze, Baibolo ikalanda vino Leza waomba na antu pa myaka iingi; akuno tukalolela vino Leza waya. Fwandi tungati namwe kwene Baibolo ingamwavwa ukumanya Leza. Ikalondolola vino mungacita pa kuti muye cuza wakwe.—Welengini Masamu 19:7, 11; Yakobo 2:23; 4:8.
4. Mungacita uli pa kuti muvwikisye Baibolo?
Kabuku kaa kamamwavwa ukuvwikisya Baibolo, pano kakuomvya inzila ino Yesu waomvizye pa kusambilizya antu. Watemilwe ukuwelengela antu amalembelo kapya walondololanga upiliulo wa malembelo.—Welengini Luka 24:27, 45.
Cumi kwene ilyasi lisuma lino Leza akatuneena lyazipisya ukuluta! Nomba kwaya antu yamwi aasilonda ukumvwa ilyasi lii; alino yauze yene, yakasoka nu kusoka ndi mwayaneena pi lyasi lilyo. Mwemo mwalukusambilila sile. Nga mukulonda kuti mukiikale amanda pe, mufwile ukumanya Leza.—Welengini Yoane 17:3.
^ pala. 3 Muwelenge na kabuku ka cizungu ka kuti A Book for All People.
