Nopa kuali tlamachtili tlen kiijtoua kenijkatsa maseualmej itstosej nochipa ipan Tlaltipaktli ijkuilijtok ipan Biblia (Salmo 37:29). Biblia kipia 66 pilamochtsitsij. Uan toTeotsij kichijki ma kiijkuilokaj 40 tlakamej. Moisés kiijkuilok nopa achtoui makuili pilamochtsitsij kipia se 3,500 xiuitl. Uan kipia se 1,900 xiuitl kema apóstol Juan kiijkuilok nopa pilamochtsi tlen ika tlami Biblia. ¿Ajkia kiniljuijtiajki tlake kiijkuiloskiaj nopa tlakamej? ToTeotsij kitekiuik itonal uan kej nopa kiniljuijtiajki tlake kiijkuiloskiaj (2 Samuel 23:2). Ni tlakamej amo kiijkuilojkej san tlen inijuantij moiljuiyayaj. Uajka Jehová kichijki ma kiijkuilokaj Biblia. (Xijpoua 2 Timoteo 3:16; 2 Pedro 1:20 uan 21).

Xikita nopa video ¿Ajkia kichijki ma moijkuilo Biblia?

Pampa toTeotsij kichijki ma moijkuilo. Uan tijneltokaj ni pampa ya xitlauak kiijtoua tlake panos teipa uan maseualmej amo uelij kichiuaj nopa (Josué 23:14). San toTeotsij katli kipia nochi chikaualistli kiijtoua tlake panos teipa. (Xijpoua Isaías 42:9 uan 46:10).

Yeka tijmatij amo onka seyok amochtli kej Biblia. Ni amochtli kichijtokej uan kitlajtolkueptokej ipan miak tlajtoli. Maske uejkajkia kiijkuilojkej, Biblia ipa kiijtojtoya tlen nama kimatij katli tlauel ixtlamatij. Nochi tlen kiijkuilojkej nopa 40 tlakamej kinextia sanse tlalnamikilistli. * Uan ipan Biblia kuali nesi kenijkatsa toTeotsij tlauel techiknelia uan kenijkatsa ueli kipatla maseualmej ininnemilis. Yeka miakej kineltokaj Biblia nelia toTeotsij iTlajtol. (Xijpoua 1 Tesalonicenses 2:13).

Xikita nopa video ¿Kenke uelis timotemachisej nelia tlen kiijtoua Biblia?

Biblia kiijtoua toTeotsij mosentlalijtok kinmakas maseualmej tlen tlauel kuali. Nojkia kiixtoma kenke ika tlen kichijkej nopa achtoui maseualmej ayokmo kinkajkej ma itstokaj ipan Xochimili, uan nojkia kenijkatsa toTeotsij sampa kichiuas se xochimili. (Xijpoua Apocalipsis (Revelación) 21:4 uan 5).

ToTeotsij iTlajtol nojkia kipia tlanauatili, tlajtoli tlen techyakana uan tlen techtlajtolmaka. Nojkia kinextia tlake kinchiuilijtok katli kichijtokej tlen kuali uan tlen amo kuali, uan nopa technextilia kenijkatsa ya. Uajka Biblia techpaleuia tikixmatisej toTeotsij uan nojkia kenijkatsa uelis timouampojchiuasej iuaya. (Xijpoua Salmo 19:7, 11; Santiago 2:23 uan 4:8).

Kema Jesús tlamachtik kiijtouayaya se texto tlen uala ipan Biblia uan teipa kiixtomayaya, kiampa kichijki “ma kimachilikaj itlajtol toTeko”. Ni pilamochtsi nojkia kej nopa techmachtis, yeka mitspaleuis kuali tijkuamachilis tlen kiijtoua Biblia. (Xijpoua Lucas 24:27 uan 45).

Nelia tlauel mitspaktis nojua tijmatis nopa kuali tlajtoli tlen toTeotsij techmachtia. Sekij amo kinpaktia uan sekinok kualanij kema kinpouiliaj toTeotsij iTlajtol. Maske inijuantij amo kinekij, amo xijkaua ma mitstsakuilikaj. Pampa ipan Biblia kiijtoua tlaj tikixmatisej toTeotsij uelis tiitstosej nochipa. (Xijpoua Juan 17:3).