Itech Biblia moajsi se kuali tanauatil tein kijtoua ke nochin taltikpakneminij nemiskej nochipaya nikan taltikpak (Salmo 37:29). Nejin amaix kipia 66 amatajkuiloltsitsin uan Dios kinixpejpenak kemej 40 takamej yolmelaujkej maj kijkuilouanij. Yekinika makuil amatajkuilolmej kijkuiloj Moisés kipia tres mil quinientos xiujmejya. Amatajkuilol tein ika tami, kijkuiloj Juan panoua mil novecientos xiujmejya. Tanemililmej tein moajsij itech Biblia yejua itanemililuan Dios. Ika yektikatsin espíritu yejuatsin kiniluij tajkuilouanij tein monekia kijkuiloskej (2 Samuel 23:2). Yejuan kiamatalijkej tein Dios kinnauatij, amo tein yejuan kinemiliayaj. Yejua ika, tein ijkuiliujtok itech Biblia yejua itanemililuan Jiova. Xikonixtajtolti 2 Timoteo 3:16 uan 2 Pedro 1:20, 21.

Xikonita video ¿Akoni itanemililuan tein ijkuiliujtok itech Biblia?

Tikmatij ke Biblia ualeua imako Dios porin achto tel kuali kijtoj tein mochiuaskia satepan. Nion se taltikpaknenkej ueli kichiua nejon (Josué 23:14). Sayoj Dios akin kipia nochi uelilis senkis ueli kijtoua achto tein techpanos satepan. Xikonixtajtolti Isaías 42:9 uan 46:10.

Komo se amatajkuilol ualeua imako Dios kijtosneki ke amo onkak okse kemej nejon. Biblia momoyauakya tel miak millones itech panoua cuatrocientos cincuenta tataman tajtolmej. Maski tel uejkaujya moijkuiloj, tein kijtoua Biblia iuan mouika tein momachtiaj tamatinij. Uan no, tanemililmej tein kijkuilojkej 40 takamej, nion se moixnamiki. * Itech nochi Biblia no moita inetasojtalis Dios, tein kinextia ke iaxka, uan hasta axkan kipia chikaualis tein kichiua maj taltikpakneminij kipatakan ininnemilis. Nochi nejin tapaleuia maj tel miakej kineltokakan ke Biblia iTajtol Dios. Xikonixtajtolti 1 Tesalonicenses 2:13.

Xikonita video ¿Keyej uelis tikneltokaskej ke melauak tein kijtoua Biblia?

Biblia semi ika tajtoua tanejnekilis tein Dios kinpialia taltikpakneminij; nejin se tanauatil tein kuali. No kijtoua keniuj taltikpaknenkej kipoloj ikualtsin nemilis itech se xochital uan kijtoua keniuj oksepa nikan taltikpak mochiuas se xochital. Xikonixtajtolti Apocalipsis 21:4, 5.

ITajtol Dios no kipia tanauatilmej, tajtolmej tein techpaleuiaj itech tonemilis uan tayolmajxitilismej. Uan no, kitemaka neskayomej tein kinextia keniuj Dios mouika iniuan taltikpakneminij. Ika nochi nejin tikmatij keniuj tamati yejuatsin. Ijkon, Biblia uelis techpaleuis maj tikixmatikan Dios uan kimelaua keniuj uelis timouikaskej iuan. Xikonixtajtolti Salmo 19:7, 11; Santiago 2:23, TNM, uan 4:8.

Ijkuak Jesús ika tajtouaya se tajkuilol kimelauaya tein kijtosneki, ijkon akin kikakiaj ueliaj kiajsikamatiaj Tajkuilolmej. Nejin amaix no ijkon kichiua, ijkon techpaleuis maj okachi tikajsikamatikan tein tamachtia Biblia. Xikonixtajtolti Lucas 24:27, 45.

Yekmelauj kiualkui yolpakilis kuali tanauatilmej tein Dios kitemaka. Maski ijkon, seki taltikpakneminij amo kinekij kimatiskej, uan oksekin hasta mokuejmolouaj keman tikinixmatiltiaj. Sayoj ke amo xikonkaua maj nejon mitsontsakuili. Moneki tikonixmatis Dios, ta sayoj ijkon uelis tionnemis nochipaya. Xikonixtajtolti Juan 17:3.