LESSON 3
Ichokomende Na Kuti Indebo Imbuya Jinova Kuna Mwali?
1. Ndiyani Unkwali weBhayibhili?
Indebo imbuya jokuti banhu banoogalikana nokusinopela penyika jilokwalwa muBhayibhili. (Lwimbo 37:29) IBhayibhili linamakwalo matukutuku ali 66. Mwali wakashingisa banhu bananga 40 balobimbika kuwakwala. Makwalo mashanu okutanga akakwalwa naMozesi mumakole ananga 3 500 akapinda. Igwalo lyokupejeleja lakakwalwa nompositoli Johani mumakole ayipo pezhulu pe1 900 akapinda. Bakwali beBhayibhili bakakwala miyeyo yaani? Mwali wakalebeleka nabakwali beBhayibhili eshingisa umpepo unchena. (2 Samuweli 23:2) Abajakakwala miyeyo yabo koga yaMwali. Nokudalo, Jehova ndiye Unkwali weBhayibheli.—Bala 2 Timoti 3:16; 2 Pita 1:20, 21.
2. Tingaziba chini kuti iBhayibhili ndilyechokomende?
Tinoziba kuti iBhayibhili linova kuna Mwali nokuti linotibuja zwose zwichootikana kuchimbeli. Apana unhu angatubula kuta alo. (Joshuwa 23:14) Mwali Wamasimba ose ndiye ega angatibuja ilebeswa nozwelyamangwana lyabanhu.—Bala Izaya 42:9; 46:10.
Igwalo linova kuna Mwali linokwelela kuba lyakasiyana naamwe makwalo. IBhayibhili ndizwo zwalili. Zwiulu nezwiulu zwinji zwamaBhayibhili zwakakobelwa kumazana manji endimi. IBhayibhili lyakakwalwa ntolo koga linovumilana nezwimwe zwechokomende zwinolebwa nesayensi. Akale bakwali balo bali 40 bakakwala zwinhu zwinowililana. * Pezhulu pozwo, zwinolebwa neBhayibhili nozwoludo zwinotondeja pasina kukahajika kuti linova kuna Mwali una ludo. Akale lichine simba lyokushandula bugalo bwabanhu bube bubuyanana. Zwinhu yezwi zwinota kuti banhu bedimbwe kuti iBhayibhili iWhi lyaMwali.—Bala 1 BaTesalonika 2:13.
3. IBhayibhili linotibuja nozweni?
IBhayibhili linowaja kutibuja nendebo imbuya jokuti Mwali una chinangwa chibuya nabanhu. Makwalo anobhawunula kuti banhu bakalashikilwa chini nechipo chokulalama mupaladayisi penyika banhu bechinova mukubumbwa, akale kuti ipaladayisi linoobwilizwa chini.—Bala Zwakatondejelwa 21:4, 5.
IWhi lyaMwali line milawu, zwikumbulujo namaano. Pezhulu pozwo, iBhayibhili linotibuja kuti Mwali wakashingilana chini nabanhu bantolo, akale yezwi zwinotondeja kuti ndiMwali uli chini. Neyo inzila, lingakubhancha kuti uunzibe Mwali. Linokubuja kuti ungaba chini unkwayina uwe.—Bala Lwimbo 19:7, 11; Jemusi 2:23; 4:8.
4. Ungaliwhisisisa chini iBhayibhili?
Lukwalo yolu lunokubhancha kuti uwhisisise iBhayibhili ukwejejela inzila yakashingiswa naJesu. Walugala elebeleka zwimo muBhayibhili akale epandulula “zwalulebwa naMakwalo.”—Bala Luka 24:27, 45.
Apana chinhu chinonakilija sendebo imbuya jinova kuna Mwali. Koga bamwe abatojishantila akale bamwe jinobanyeteja. Yezwi zwisikuboje moyo nokuti chibimbo chokuba nobupenyu businopela chinova pakuunziba kuko Mwali.—Bala Johani 17:3.
^ par 3 Bona lukwalo lunowhi A Book for All People.
