Uthenga uweme wakuti ŵanthu azankhale kosasila pano pachalo ufwaniwa m’baibolo. (Salimo 37:29) M’Baibolo muli mabuku 66, atontho-atontho soti polemba mabuku amene aŵa, Mulungu ekatishila ntchito analume ochetekeleka okwanila 40. Mabuku 5 oyambilila elembewa na Mose vyaka 3.500 kuvuli. Buku yosilijila yelembewa na mtumwi Yohane vyaka vopitilila 1.900 kuvuli. Kansi elemba baibolo enzolemba malingalilo yaŵani? Mulungu ekatishila ntchito mzimu utuŵa powujila ŵala elemba Baibolo. (2 Samueli 23:2) Ove elemba malingalilo ya Mulungu osati yao. Tetyo, Yehova niye mulembi ngaye-ngaye wa Baibolo.—Ŵelengani 2 Timoteyo 3:16; 2 Petulo 1:20, 21.

Tuziŵa kuti Baibolo yefuma kwa Mulungu ndaŵa yulaŵila vakusogolo komasoti vachendi na satane-satane wake. Paliye munthu angachite vamene ivi. (Yoswa 23:14) Mulungu yeka wamphamvu yonse niye woziŵilatu vinthu viti vizechitike kusogolo.—Ŵelengani Yesaya 42:9; 46:10.

Mosakayikila buku yofuma kwa Mulungu yuwamila kuŵa yosiyana na buku iyakine iliyonse. Umu niye mwailili Baibolo. Mabaibolo okwana mabiliyoni, ayaŵiwa muvilaŵilo vufwika mahandiledi anyinji. Olo kuti nikale peilembewa Baibolo, yukatijana na sayansi. Koma soti ŵanthu 40 elemba Baibolo aliye lembe voshushana. Yove yutiphunzisa soti za chikondi. * Baibolo ili na mphamvu yoyavya ŵanthu kuti aŵe na minkhalidwe iweme. Ivi vuchitisha kuti  ŵanthu mamiliyoni anyinji asimikije kuti Baibolo ni malizu a Mulungu.—Ŵelengani 1 Atesalonika 2:13.

Baibolo yulaŵila ngako za uthenga uweme wakuti Mulungu ana malingalilo aweme ku ŵanthu. Malemba olaŵila mwechitaila mwayi wonkhala m’paladaiso, kuchiyambe-yambe kwa mbili ya ŵanthu.—Ŵelengani Chivumbulutso 21:4, 5.

Malizu a Mulungu ali na malamulo ŵake, nsonga, na malangizo. M’Baibolo muli nkhani zulaŵila venzochitila Mulungu ŵanthu. Tikaŵelenga nkhani zamene izo tuziŵa za mankhalidwe a Mulungu. Tetyo Baibolo ingakuyavyeni kumuziŵa luweme Mulungu. Yulaŵila soti vamungachite kuti munkhale shamwali wake.—Ŵelengani Salimo 19:7, 11; Yakobo 2:23; 4:8.

Kabuku aka Kakuyavyeni kuinvwishisha Baibolo chifukwa Yesu ekatishila ntchito njila yamene iyi. Yove enzokondwela poŵelenga malemba nofotokoza ‘tanthauzo ya malemba.’—Ŵelengani Luka 24:27, 45.

Paliye chinthu chotemwesha chuposha uthenga uweme wofumila kuli Mulungu, olo kuti nitetyo, ŵanthu ayakine ofunalini kumvwa, komasoti ayakine okalipa chifukwa cha uthenga wamene uyu. Koma zamene izi osati zikulefuleni yayi, chifukwa ngati mufuna kuzapeza umi wosasila, muwamila kuphunzila kuti mum’ziŵe luweme Mulungu.—Ŵelengani Yohane 17:3.