Leyere ue kɔ pya nɛɛ̄ e tɔɔ̄dum a kɛnɛkɛ̄ ina deedee lu e ɛ̄m bu Baibol. (Le-yɔɔ 37:29) Baibol ɛrɛ 66 nwīesɔgɔ kpa. Bari bee su nu alu 40 pya nɛɛ̄ abɔ ture nyiɛ loo ɛ̄ma. Lo tua tua o,oo kpa ale bu Baibol bee lu e ɛ̄m tɛ̄maba Mozis bu nu alu 3,500 zua akii adumɛ. Lo kpɛdumɛ̄ kpa bee lu e’ɛ̄m tɛ̄maba nɛɛ̄ lɛɛratam Jɔn bu nu a eeloo 1,900 zua akii adumɛ. Ekɛɛrɛ mɛɛ̄ na pya nɛɛ̄ abee ɛ̄m Baibol bee ɛm ani? Bari bee kɔ ue nɛ pya a ɛm Baibol tɛmaloo ye kaɛ edɔɔ̄. (2 Samuel 23:2) Ba bee ɛm ekɛɛrɛ Bari naale alaba ekɛɛrɛ. Nyɔwo, Jɛhova na a ɛrɛ ue ale bu Baibol a.—Buū 2 Timɔti 3:16; 2 Pita 1:20, 21.

I suā kɔ Baibol aaba Bari nyɔnɛbee a kɔ kaānā nu e sira li deesī mmɛɛ. Lɔgɔ nɛɛ̄ naa dap doowo. (Joshua 23:14) Aba Bari a Eenyɔɔ dɛ̄dɛɛ̄ nu na a dap muɛ̄ deesī miɔ̄ŋɔ nɛɛ̄ leere a.—Buū Aisaia 42:9; 46:10.

I ɛ̄madɛɛ̄ kɔ kpa a aaba Bari alu keebee, e kɛ̄ ale doo lo. Gbɛnɛ-edo Biliɔn ekpo Baibol elua e dɔɔ̄ yaari bu booboo muɛ̄ ue. Kere aadoo abee lu e’ɛ̄m akere, Baibol yere kpotɛ̄ lo ue saɛns alu kaka. Gbaānage loo kɔ nu 40 pya nɛɛ̄ a, bee ɛ̄m, naa be ziī. * Gbaāloo wo, nu Baibol kɔ kiiloo wereloo ɛrɛ e aaba aba lo kaka Bari-Bari wereloo, sa lege gaa ɛrɛ ekpo lo eyaānā dum pya nɛɛ̄ doo kɔ alee. Pya lo kaka ama doo kɔ gbɛnɛkpo miliɔn pya nɛɛ̄ a suā leere kɔ Baibol ɛɛ ue Bari.—Buū 1 Pya Tɛsalɔnaika 2:13.

Ue Kpa Baibol dɛɛa nyɔɔ na kɔ, Bari ɛrɛ ekɛɛrɛ wereloo loo gānɛɛ̄. Kpa kaɛ bagitɛ̄ kɛ̄ nɛɛ̄ bee peere dee abee ye kpaā nɛ̄ loe tɔɔ̄dum bu paradais akɛnɛkɛ̄ doo, le sīdee paradais elu e obara sere ye dɔ.—Buū Mumuuna 21:4, 5.

Muɛ̄ Ue Bari aara nage lok, pya nu alu egbī i aāba, le zuurabatɔ̄. Gbaāloo wo, Baibol aara eloh akiiloo kɛ̄ Bari bee nyɔɔnɛ pya nɛɛ̄ dania nu a dee kere doo—eloh a muūna dogo Bari siā. Nyɔwo, Baibol dap a yerebah nɛ kɔ o suā loo Bari. A kɔ kpaānā kɛ̄ o dap lu ye gbo doo.—Buū Le-yɔɔ 19:7, 11; Jemes 2:23; 4:8.

Nwīekpo kpa ama e yerebah anɛ kɔ o dābee loo Baibol tɛmaloo enyɔɔnɛ sīdee Jizɔs bee doo. A bee kɔ ue aāloo ziī dɔ Baibol dɔloo lo dɔɔ̄na, sa kɔ baatɛ̄ doo kɔ alu “esuā nu ale bu kpa kaɛ.”—Buū Luk 24:27, 45.

Kunɛ nwīepoo nu na adap nɛ ɛɛbu nɛɛ̄ doodoo leyere ue a aaba Bari a. Kerewo, pio nɛɛ̄ naa ɛrɛ taɛ bu, sa pio nɛɛ̄ ɛrɛ biirabu kumaloo. Oa iye kɔ lo amā a ɔɛ aloo. O bɛābu ɛrɛ ekpeloo dum ina deedee dɛɛa nyɔɔ o suā loo Bari.—Buū Jɔn 17:3.