YACHACHINA 3
¿Ciertu can ima Biblíap alli noticiasnin Tata Yayamanta amuncu?
1. ¿Pi ʼruara Biblia escribicunanta?
Alli noticias, ima Ashpapi únay unáypaj cáusaj ʼriycu, Bibliapi taricun (Salmo 37:29). Biblia 66 libritus apin. Tata Yaya ajllara 40 ckaris fielesta Bibliát escribinancúpaj. Huámaj pishcka librusta, na ʼruan 3.500 huatas ima Moisés escribera y ckepa libru escribiscka cara na astaan 1.900 huatas apóstul Juanchuraycu. Biblia yachachisckanta Tata Yayamanta amun. Pay espíritu santunta utilisara ʼrimáypaj escritoresuan Bibliamanta (2 Samuel 23:2). Cay ckaris Tata Yáyap pensasckanta escriberancu y mana paycuna pensasckancuta. Chayraycu, Jehová ʼruara Biblia escribicunanta. 2 Timoteo 3:16 y 2 Pedro 1:20, 21 léey.
Ckáay vidiu ¿Quién es el autor de la Biblia?
2. ¿Imajchus niyta atiycu Biblia nisckanta checka can?
Yachaycu Biblia Tata Yayamanta amun y chayna can imajraycu nin imaina ámoj pacha caj ʼrin, chayta nima persuna ʼruayta atin (Josué 23:14). Tata Yaya túcuy atiyniyojlla, chayta ʼruayta atin. Isaías 42:9 y 46:10 léey.
Si suj libru Tata Yayamanta amun, suyacun ancha alli cachun. Y Biblia chayna can. Ancha ashca ashca ckalluspi traducicora y reparticora. Amapas ñaupamanta can, cenciaan de acuerdu tían. Nátaj, 40 escritores paycunapura mana contradecicuncu. Astaanpas, sapa suj paginasninpi Tata Yáyap munayninta ckaachin y aun cunan átiy apin persunasta causaynincupi yanapacuyta. Chayraycu, ancha ashca persunas convencecuncu ima Biblia Tata Yáyap ʼRimaynin can. 1 Tesalonicenses 2:13 léey.
Ckáay vidiu ¿Por qué podemos confiar en que la Biblia dice la verdad?
3. Biblia, ¿imatmanta ʼriman?
Huámaj noticias Bibliamanta cancu cá alli noticias: Tata Yaya apin suj alli propósitu túcuy persunáspaj. Niáysh ima huámaj ckari mana casúcoj cas chincara causayta Ashpapi suj jardín ina ʼruascka y nin imaina Ashpa cutis jardín ina ʼruascka caj ʼrin. Apocalipsis 21:4, 5 léey.
Tata Yáyap ʼRimaynin apin leyes, principius y consejus. Niaycupas imaina Jehová persunasuan cara y chayna cualidaresninta ckaachiáysh. Biblia yanapaáysh Tata Yayát ʼrejsiyta y yachachiáysh imaina yanasusnin cayta atíysh. Salmo 19:7, 11; Santiago 2:23 y 4:8 léey.
4. ¿Ima yanapaayshta atin Bibliát unanchayta?
Jishu unanchachicúypaj Biblia niyta munasckanta, versículus léej cara y unanchachícoj cara. Cá folletu chaynapas ʼruan yanapaáyshpaj allít unanchanáyshpaj Biblia yachachisckanta. Lucas 24:27, 45 léey.
Túcuy noticiasmanta, noticias ima Tata Yayamanta amuncu astaan alli cancu. Chaynapas huaquin persunasta mana nimátap caymanta yachayta munancu y sujcuna piñacuncu chaymanta ʼrimapucuptincu. Pero ama sackeychu chay desanimasuchun. Suyanayqui túcuy tiempúpaj causayta ckaanan tían ima ckam Tata Yayát ʼrejsiyta chayanayquita. Juan 17:3 léey.
