Allpaibi huiñai causanamanda cuintaigunaga Bibliaimi tian (Mateo 5:5). Bibliaibiga 66 ichilla librogunami tian. Chita quillcanauchun nishami 40 runagunata Diosca anllara. Punda pichca librogunataga Moisesmi 3.500 huataguna huashama quillcara. Chasnallata tucuri parti librotaga 1.900 huataguna huashamami apostol Juan quillcara. Bibliaibi nishcagunaga Diospac Shimi man. Diosca Bibliata quillcaccunataga paiba espirituta cushami quillcachira. Chiraicu chi runagunaga mana paigunahua yuyaita quillcanaurachu. Diospa yuyaitami quillcanaura. Chasna acpimi Bibliaibi tiauc yuyaigunaga Diospac an. 2 Timoteo 3:​16; 2 Pedro 1:​20, 21, leingui.

Cai videota ricui: Pita Bibliata quillcachira

Bibliaga Diospa Shimi ashcamandami shamuc punzhamanda cuintasha mana shuc shimillas pandarinzhu. Runagunaga mana chita ranata ushanaunzhu (Mateo 5:18). Tucui Ushaita Charic Diosllami chita ranata ushan. Apocalipsis 22:6, leingui.

Bibliaga Diosmanda shamuc libro ashami, shuc librogunamandahuas astahuan ali an. Huaranga huaranga Bibliagunaga 450 yali shimigunaibimi llucshishcauna. Cientifico nishca runaguna yachaushcagunaga Bibliai nishca shina man. Astahuambas, Bibliata 40 runaguna quillcashahuas mana shucta shucta nisha pandarinaunzhu. * Sallata, huin Bibliaibiga Dios llaquishcatami ricuchin. Cunanbas runagunahua causaita alichingahua ushaitami charin. Chita yachashami, ashca huaranga runaguna quirinaun, Bibliaga Diospa Shimi acta. 1 Tesalonicenses 2:​13, leingui.

Cai videota ricui: Imahuata Biblia sirtu ashcata quirina anchi

Bibliaga gustu uyaric shimigunatami cuintan. Diosmi runagunama sumac causaita cunata munan nishami Bibliaga cuintan. Bibliaga ninmi, callari punzhagunaibi runaguna paraisoibi causanata chingachishcata. Chasnallata yachachinmmi, imasa chi paraiso cutillata tucungaraushcata. Apocalipsis 21:​4, 5, leingui.

Bibliaga Dios mandashcagunata, ali yuyaigunata, cunaigunatahuas yachachinmi. Chasnallata, runaguna alita mana alita racpi, Dios imata rashcatas cuintanmi. Chiga ricuchinmi pai imasa ashcata. Bibliaga Diosta ricsinauchun nishami yanapan. Astahuambas, yachachinmi imasa Diospa amigo tucunata. Salmos 19:​7, 11; Santiago 2:​23; 4:8, leingui.

Diospa Shimita pasacta yachachingahuaga, Jesusca shuc textogunata rimashca huashami chita alita intindichic ara. Cai folletoga Jesus yachachishca shinami Bibliata alita intindingahua yanapai tucunchi. Lucas 24:27, 45, leingui.

Diospa gustu cuintaigunata yachashaga, cambas cushiyanguimi. Shuc runagunaga chitaga mana yachanata munanaunzhu. Cuti shuccunaga Biblia nishcata cuintasha nicpiga, piñarinaunmi. Chi runaguna Bibliata yachanata saqui nicpihuas mana saquina changui. Biblia nishca shinaga, Diosmanda yachauc runagunaga huiñaibacmi causangauna. Juan 17:3, leingui.