Di bunu buka di dë taa sëmbë o libi u teego a goonliba aki, sikifi a di Bëibel (Psalöm 37:29). Di Bëibel da wan buku di abi 66 piki buku. Gadu bi tei söwan 40 bumbuu womi u sikifi dee buku dë. Mosesi hën sikifi dee feifi fosu buku u di Bëibel söwan 3500 jaa pasa kaa. Apösutu Johanisi hën sikifi di lasiti buku u Bëibel söwan 1900 jaa pasa kaa. Ambë pakisei dee Bëibel sikifima sikifi buta a di Bëibel? Gadu bi wooko ku di santa jeje fëën u fan ku dee Bëibel sikifima (2 Samuëli 23:2). Dee pakisei u Gadu de bi sikifi, ma na di u deseei. Fëën mbei Jehovah hën da di Sikifima u di Bëibel.​—Lesi 2 Timoteo 3:16; 2 Petuisi 1:20, 21.

Luku di fëlön Ambë sikifi di Bëibel?

U sabi taa di Bëibel kumutu u Gadu u di a ta taki finifini a fesi fa soni o pasa tuutuu a di ten di ta ko. Na wan sëmbë sa du di soni dë (Josua 23:14). Di Möön Makiti Gadu u mundu wanwan tö sa si a fesi gbelingbelin andi o pasa ku libisëmbë a di ten di ta ko.​—Lesi Jesaaja 42:9; 46:10.

U bi o kë taa wan buku di kumutu a Gadu dë wan apaiti buku. Wë nöö sö a dë ku di Bëibel. A pasa tu dusu milion Bëibel di paati da sëmbë a möön leki 450 töngö. Hii fa di Bëibel gaandi, tökuseei a ta kai ku dee soni dee könima ko feni. Söseei dee 40 sikifima fëën an ta taki soni di an ta kai ku deseei. Boiti di dë, di lobi di Bëibel ta taki fëën bi sa kumutu u di tuutuu Gadu nöö, di Gadu u lobi. Nöö di Bëibel abi di kaakiti u tooka sëmbë libi ko möön bunu. Dee  soni aki ta mbei milionmilion sëmbë ta biibi taa di Bëibel da di Wöutu u Gadu tuutuu.​—Lesi 1 Tesalonika 2:13.

Luku di fëlön Unfa u sa dë seiki taa di Bëibel ta konda tuutuu soni?

Di Bëibel ta buta pakisei a di bunu buka taa Gadu abi bunu soni a pakisei u du da libisëmbë. Gadu Buku ta konda finifini da u fa libisëmbë bi lasi di gaandi u libi a wan paladëisi a goonliba aki a di bigi di Gadu bi mbei libisëmbë. Söseei a ta konda da u fa di paladëisi o toona seti baka.​—Lesi Akoalimbo 21:4, 5.

Söseei di Wöutu u Gadu abi wëti, mama wëti ku lai. Boiti di dë di Bëibel ta taki fa Gadu bi wooko ku libisëmbë, nöö di dë ta lei u fa Gadu dë tuutuu. Hën da di Bëibel sa heepi i u ko sabi Gadu. A ta konda da i fa i sa ko toon wan mati fëën.​—Lesi Psalöm 19:7, 11; Jakobosi 2:23; 4:8.

Di buku aki o heepi i u fusutan di Bëibel te i ta wooko ku di Bëibel kumafa Jesosi bi ta wooko ku ën. A bi ta kai Bëibel tëkisi, nöö a bi ta mbei de „fusutan di Buku u Gadu”.​—Lesi Lukasi 24:27, 45.

Soni an dë di waiti sö kuma di bunu buka di kumutu u Gadu. Tökuseei sömëni sëmbë an ta pena buta pakisei a di bunu buka, nöö wotowan hati ta boonu ku di bunu buka dë seei. Ma na lasi hati. I musu ko sabi Gadu ee i kë feni di libi u teego.​—Lesi Johanisi 17:3.