Letindzaba letimnandzi tekutsi bantfu bayawuphila kuze kube phakadze emhlabeni, tibhalwe eBhayibhelini. (Tihlabelelo 37:29) LiBhayibheli lakhiwa tincwadzi letincane letingu-66. Nkulunkulu wasebentisa emadvodza langaba ngu-40 kutsi abhale liBhayibheli. Tincwadzi letisihlanu tekucala tabhalwa nguMose eminyakeni lengaba ngu-3 500 leyengcile. Incwadzi yekugcina yabhalwa ngumphostoli Johane eminyakeni lengetulu kwalengu-1 900 leyengcile. Babhali beliBhayibheli babhala imibono yabani? Nkulunkulu abekhulumisana nalababhali asebentisa umoya wakhe longcwele. (2 Samuweli 23:2) Babhala imicondvo yaNkulunkulu, hhayi yabo. Ngako-ke nguJehova longumBhali weliBhayibheli.​—Fundza 2 Thimothi 3:16; 2 Phetro 1:20, 21.

Siyati kutsi liBhayibheli livela kuNkulunkulu ngobe liwabeka ngendlela lenembile onkhe emaciniso lamayelana nelikusasa. Kute umuntfu longakwenta loko. (Joshuwa 23:14) NguNkulunkulu Somandla kuphela lokwati kulibona kahle likusasa lebantfu.​—Fundza Isaya 42:9; 46:10.

Sikulindzele kutsi incwadzi levela kuNkulunkulu yehluke kuletinye, futsi liBhayibheli linjalo. Kusakatwe tigidzi temakhophi eliBhayibheli futsi lasakatwa ngemakhulu etilwimi. Nanobe liyincwadzi yakadzeni, liBhayibheli liyavumelana nesayensi. Futsi lababhali balo labangu-40 bebangaphikisani. * Ngetulu kwaloko, loko liBhayibheli lelikushoko ngelutsandvo kuvela kuphela kuNkulunkulu weliciniso—Nkulunkulu lonelutsandvo, futsi lisenawo emandla ekushintja kuphila kwebantfu kutsi kube ncono. Lamaciniso enta tigidzi tebantfu tikholwe kutsi liBhayibheli liliVi laNkulunkulu.​—Fundza 1 Thesalonika 2:13.

Intfo liBhayibheli lelikhuluma ngayo kakhulu tindzaba letimnandzi tekutsi Nkulunkulu unenjongo lenhle ngebantfu. ImiBhalo iyachaza kutsi ekucaleni umuntfu lamlahlekela njani lilungelo lekuphila epharadisi emhlabeni, kanye nekutsi lelo pharadisi litawubuyiselwa njani.​—Fundza Sembulo 21:4, 5.

LiVi laNkulunkulu licuketse nemitsetfo, timiso, kanye neteluleko. Ngetulu kwaloko, liBhayibheli lilandzisa ngendlela Nkulunkulu lasebentelana ngayo nebantfu—lokungumlandvo lowembula buntfu bakhe. Ngako-ke, liBhayibheli lingakusita kutsi umati Nkulunkulu. Liyachaza nekutsi ungaba kanjani ngumngani wakhe.​—Fundza Tihlabelelo 19:7, 11; Jakobe 2:23; 4:8.

Lencwajana itakusita kutsi ulicondze liBhayibheli, ngobe isebentisa indlela lefanana naleyo leyasetjentiswa nguJesu. Abecaphuna livesi ngalinye futsi achaza loko ‘lokwakushiwo yimiBhalo.’​—Fundza Lukha 24:27, 45.

Timbalwa tintfo letijabulisa njengetindzaba letimnandzi letivela kuNkulunkulu. Nobe kunjalo, labanye bantfu abatitsandzi, futsi labanye bona bayatenyanya ngisho nekutenyanya. Ungapheli emandla, ngobe kutfola kwakho kuphila lokuphakadze kutawuya ngekutsi uyamati yini Nkulunkulu.​—Fundza Johane 17:3.